ەلىمىزدە دارىلىك وسىمدىكتەر جويىلىپ بارادى
دەرتكە داۋا بولار بيولوگيالىق بەلسەندى قوسپا ازىرلەپ جۇرگەن وتانداسىمىز، فارماتسەفت- عالىم ارعىنبەك قابىلقاق ەمدىك وسىمدىكتەر قورىن كوبەيتۋ كەرەكتىگىن ايتادى.
عالىم ارعىنبەك قابىلقاق ەمدىك شوپتەردى ىزدەپ، 3 جىلدا ەلىمىزدىڭ بارلىق ايماعىن ارالاپ شىعىپتى. ايتۋىنشا، قازاق جەرى شيپالى وسىمدىككە باي. ءبىراق ونى، جەرگىلىكتى تۇرعىندار رەتسىز قازىپ الىپ، تابىس تابۋ ءۇشىن سىرتقا تاسىمالداۋدا. سونىڭ كەسىرىنەن ەلىمىزدە دارىلىك وسىمدىكتەردىڭ قورى ازايعان. سوندىقتان دەرتكە داۋا وسىمدىكتەردى قولدان ەگىپ، كوبەيتۋ كەرەك.
ارعىنبەك قابىلقاق، فارماتسيەۆت- عالىم:
- سۇڭعىلانىڭ ءوزى قىتايدا ءۇش ءتۇرى بار بولسا، قازاقستاندا 7 تۇرگە جۋىعى بار. ادامنىڭ دەنەسىندەگى كۇيىك، ۇسىك اۋرۋلارىن ماسەلەن، تىرتىقسىز، ەشقانداي كۇشسىز جازىپ شىعۋعا بولاتىنداي وسىمدىكتەر بار تىرتىق قالدىرمايتىن. سولاردى وسى قازاقستاندا وسىرسەم قالاي بولادى دەگەن ويىم بار.
دالالىق جەرلەردە 6 مىڭنان اسا وسىمدىك ءتۇرى وسەدى. ولاردىڭ 726 ءتۇرى تەك قازاقستاندا عانا كەزدەسەدى. زىمزيا، قاسقىر جەم، جابايى سۇڭعىلا، يتسيگەك سياقتى شيپالى شوپتەردىڭ ەمدىك قاسيەتى تولىق زەرتتەلمەگەن. ماسەلەن، قىزىلوردا وڭىرىندە كەزدەسەتىن قىزىل ميانىڭ وزىنەن ءجۇز ءتۇرلى ءدارى الۋعا بولادى دەيدى.
قالداناي قارجاۋ قىزى، قازۇمۋ ينجەنەرلىك پاندەر كافەدراسىنىڭ مەڭگەرۋشىسى:
- وسىمدىكتەردى جۇيەلى تۇردە زەرتتەۋدى كەرەك. قازىرگى كەزدە قازاقستاندا 6 مىڭنان اسا وسىمدىك بولاتىن بولسا، سونىڭ 726 يندەميكالىق وسىمدىكتەر دەپ ايتىلادى. يندەميكالىق وسىمدىك دەگەنىمىز تەك ءبىزدىڭ قازاقستاندا كەزدەسەتىن تۇرلەرى. سول 726 وسىمدىكتى باسىنان اياعىنا دەيىن زەرتتەپ شىعۋ، ودان ءونىم الۋ، سىرتقا ەكسپورتقا شىعارۋ بۇل وتە ۇلكەن جۇمىس دەپ ويلايمىن.
عالىم جابايى تابيعاتتا وسەتىن شيپالى شوپتەردى قولدان ءوسىرۋ شالعايداعى جۇمىسسىز ازاماتتارعا تابىس كوزى بولاتىنىن ايتادى. ءارى بۇل ەلىمىزدىڭ فارماتسيەۆتيكالىق يندۋسترياسىن دامتۋعا جاقسى مۇمكىندىك.
www.24.kz
