قازاقستاندا سىرتتاي وقىپ، ديپلوم الىپ شىعاتىن ماماندىقتار سانى قىسقاردى

استانا. قازاقپارات - وقۋ-اعارتۋ مينيسترلىگى سىرتتاي وقۋعا ارنالعان ماماندىقتاردىڭ قايسىسى قىسقارعانىن ءتۇسىندىردى، دەپ حابارلايدى قازاقپارات ءتىلشىسى.

ق ر وقۋ- اعارتۋ مينيسترلىگى ەلىمىزدىڭ كوللەدجدەرىندە سىرتتاي وقىتۋعا ارنالعان ماماندىقتار ءتىزىمىن قىسقارتتى.

ۆەدومستۆونىڭ دەرەگىنە سۇيەنسەك، ەندى ستۋدەنتتەر تەك 23 ماماندىق بويىنشا سىرتتاي وقي الادى.

«سالىستىرمالى تۇردە ايتا كەتسەك، ەكى جىلدان استام ۋاقىت بۇرىن 595 بىلىكتىلىك بويىنشا سىرتتاي ءبىلىم الۋعا بولاتىن ەدى. ءبىراق وقىتۋدىڭ بۇل ءتۇرى ستۋدەنتتەرگە ساپالى ماشىقتى، داعدىلاردى بەرە المايدى. وسىنىڭ سالدارىنان تۇلەكتەر وقۋدى بىتىرگەننەن كەيىن پراكتيكالىق ءبىلىمنىڭ جەتىسپەۋشىلىگىمەن ءجيى كەزدەسىپ، جۇمىس تابا الماي جاتادى. وسىعان بايلانىستى مينيسترلىك سىرتتاي وقۋداعى ماماندىقتاردى قىسقارتۋ بويىنشا جۇمىستى كەزەڭ- كەزەڭىمەن جۇرگىزىپ جاتىر. بۇل جولى «راديوەلەكتروندى كولىك قۇرالدارىن پايدالانۋ جانە تەحنيكالىق قىزمەت كورسەتۋ (كولىك ءتۇرى بويىنشا)» سياقتى ماماندىقتار بويىنشا، سونداي-اق «تەحنيك- ەلەكترونيك» بىلىكتىلىگى، «تەحنيك- تەحنولوگ بىلىكتىلىگى بويىنشا «پايدالى قازبالاردى وڭدەۋ (كومىر دايىنداۋ)»، «تەحنيك- قۇرىلىسشى» بىلىكتىلىگى بويىنشا «قالالىق كوممۋنيكاتسيالاردى سالۋ جانە پايدالانۋ»، «تازالاۋ قۇرىلىستارىنىڭ تەحنولوگ- تەحنولوگى بىلىكتىلىگى بويىنشا «سۋمەن جابدىقتاۋ جانە سۋ بۇرۋ جۇيەلەرىن تازارتۋ قۇرىلىستارىن پايدالانۋ» جانە باسقا بىلىكتىلىك بويىنشا سىرتتاي وقىتۋ الىنىپ تاستالدى»، - دەپ جازادى مينيسترلىكتىڭ باسپا ءسوز قىزمەتى.

تەحنيكالىق جانە كاسىپتىك ءبىلىم دەپارتامەنتى ديرەكتورىنىڭ مىندەتىن اتقارۋشى ەرنات ءجۇنىسوۆتىڭ ايتۋىنا قاراعاندا، قازاقستاندىق كوللەدجدەردە كادرلاردى دۋالدى وقىتۋارقىلى دايارلاۋ جاقسى دامىپ كەلەدى.

«ياعني كادر دايارلاۋدا كوللەدجدەر ءىرى كاسىپورىندارمەن، بيزنەسپەن تىعىز بايلانىستا جۇمىس ىستەيدى. ويتكەنى ولارعا قانداي ماماندار قاجەت ەكەنىن ەڭبەك نارىعى انىقتايدى. سوندىقتان ءبىز سىرتتاي وقۋ تۇرىنەن بەلسەندى تۇردە الشاقتاپ جاتىرمىز جانە مۇنداي شەشىم قابىلداۋعا تۇلەكتەردىڭ وقۋدى بىتىرگەننەن كەيىن الاتىن ءبىلىم مەن داعدىلاردىڭ ساپاسىنىڭ ناشارلىعى سەبەپ بولدى. ءبىز مۇنى كەزەڭ- كەزەڭىمەن جۇرگىزىپ جاتىرمىز جانە بۇل جۇمىس ءالى دە جالعاسىن تابادى. دۋالدى وقىتۋ كەزىندە وندىرىستىك وقىتۋ مەن كاسىپتىك پراكتيكانىڭ كەمىندە %60 قامتاماسىز ەتىلەتىنىن، وسىلايشا ستۋدەنتتەردىڭ وقۋ ۋاقىتىنىڭ جارتىسىنان كوبى وندىرىستە بولاتىنىن اتاپ وتەمىن. بۇل ءتاسىل بولاشاق تۇلەكتەردىڭ ءبىلىم ساپاسى مەن بىلىكتىلىگىن ارتتىرادى جانە ولاردىڭ ءارى قاراي جۇمىسقا ورنالاسۋىن قامتاماسىز ەتەدى»، - دەدى ق ر وقۋ-اعارتۋ مينيسترلىگى تەحنيكالىق جانە كاسىپتىك ءبىلىم دەپارتامەنتى ديرەكتورىنىڭ مىندەتىن اتقارۋشى ەرنات ءجۇنىسوۆ.