مينيسترلىك شەشىمىمەن جابىلعان ينستيتۋت ليتسەنزياسىن قايتارىپ الدى

استىراۋ. قازاقپارات - سوت ءبىلىم جانە عىلىم مينيسترلىگىنىڭ شەشىمىن زاڭسىز دەپ تانىپ، ءبىلىم بەرۋ مەكەمەسىنىڭ قۇقىعىن قالپىنا كەلتىرۋگە مىندەتتەدى، دەپ حابارلايدى قازاقپارات «موي گورود» باسىلىمىنا سىلتەمە جاساپ.

اتىراۋ ينجەنەرلىك- گۋمانيتارلىق ينستيتۋتى ءبىلىم بەرۋ قىزمەتىن جۇرگىزۋ قۇقىعىن سوت ارقىلى قالپىنا كەلتىردى. بۇل تۋرالى ينستيتۋت رەكتورى ادىلبەك تۇرداليەۆ پەن قۇرىلتايشىسى ەرسايىن يحسانوۆ مالىمدەگەن.

ەندى ءبىلىم جانە عىلىم مينيسترلىگى ءبىر ايدىڭ ىشىندە وقۋ ورنىنا ليتسەنزياسىن قايتارۋى كەرەك. رەكتوردىڭ ايتۋىنشا، بارلىق پروفەسسورلىق- وقىتۋشىلىق قۇرام مەن ستۋدەنتتەرگە وقۋ پروتسەسىنىڭ قايتا جاندانعانى تۋرالى حابارلاما جىبەرىلدى.

«اتىراۋ وبلىستىق سوتىنىڭ اكىمشىلىك ىستەر جونىندەگى سوت القاسى ءبىلىم جانە عىلىم مينيسترلىگى ءبىلىم ساپاسىن قامتاماسىز ەتۋ كوميتەتىنىڭ 2022 -جىلعى 1-قىركۇيەكتەگى بۇيرىعى مەن اكتىسىن زاڭسىز دەپ تانىدى. سوت ۇكىمى 2022 -جىلدىڭ 10 قازانىندا زاڭدى كۇشىنە ەندى. شەشىم ءبىر اي ىشىندە ورىندالۋى كەرەك»، - دەلىنگەن اتىراۋ وبلىستىق سوتىنىڭ حابارلاماسىندا.

ەسكە سالايىق، 2022 -جىلدىڭ ساۋىرىندە ءبىلىم جانە عىلىم مينيسترلىگى مەملەكەتتىك ستاندارت پەن بىلىكتىلىك تالاپتارىنا سايكەس كەلمەگەندىكتەن اتىراۋ ينجەنەرلىك- گۋمانيتارلىق ينستيتۋتىنىڭ ليتسەنزياسىن قايتارىپ العان بولاتىن. ال ءبىلىم ورداسىندا 1640 ستۋدەنت وقيتىن. ينستيتۋت باسشىلىعى مينيسترلىك شەشىمىمەن كەلىسپەي، سوتقا شاعىمدانعان.