21:45, 13 - قازان 2022 | GMT +6
قانداي جاعدايدا سايلاۋ جارناسى كانديداتتارعا كەرى قايتارىلادى
استانا. قازاقپارات - ورتالىق سايلاۋ كوميسسياسىنىڭ مۇشەسى سابيلا مۇستافينا سايلاۋ جارناسى كانديداتقا قانداي جاعدايدا قايتارىلاتىنىن ءتۇسىندىردى، دەپ حابارلايدى قازاقپارات ءتىلشىسى.
«ق ر سايلاۋ تۋرالى» كونستيتۋتسيالىق زاڭىندا قانداي جاعدايدا سايلاۋ جارناسى قايتارىلاتىنى كورسەتىلگەن. بىرىنشىدەن، ەگەر كانديدات جەڭىسكە جەتسە ونىڭ جارناسى قايتارىلادى. ەكىنشى جاعداي - ۇمىتكەر سايلاۋشىلاردىڭ 5 پايىزدان كەم ەمەس داۋىسىن جيناۋى ءتيىس. سونىمەن قاتار، كانديدات قايتىس بولعان جاعدايدا سايلاۋ جارناسى ونىڭ وتباسىنا قايتارىلادى»، - دەپ ءتۇسىندىردى سابيلا مۇستافينا.
سپيكەردىڭ ايتۋىنشا، اتالعان تالاپتان باسقا جاعدايلاردا كانديداتتىڭ سايلاۋ جارناسى مەملەكەتتىك قازىنادا قالادى.
بۇگىنگى تاڭدا سايلاۋ جارناسىنىڭ مولشەرى - 3 ميلليون تەڭگە.
ەسكە سالايىق، بۇگىن ورتالىق سايلاۋ كوميسسياسى سوڭعى بولىپ قۇجات تاپسىرعان ۇمىتكەرلەردىڭ ءبىرى باقىت جاڭابايەۆتىڭ كانديداتۋراسى بارلىق تالاپتارعا ساي ەكەنىن مالىمدەدى.
