الماتىدا «ءومىر جولىمداعى سوڭعى كوش» كىتابىنىڭ تۇساۋى كەسىلدى

استانا. قازاقپارات - وتكەن عاسىرداعى اشارشىلىق پەن قۋعىن- سۇرگىن قازاق تاريحىنداعى ەڭ اۋىر سىناق بولدى. ميلليونداعان ادام كوز جۇمىپ، مىڭداعان ادام ەلدەن كەتىپ، جارتى الەمگە بوسىپ كەتتى.

قۇندى جادىگەردىڭ تانىستىرىلىمى الماتىداعى ۇلتتىق كىتاپحانادا ءوتتى. 12 تاراۋدان تۇراتىن ەڭبەكتە اۆتوردىڭ 1950 -جىلدارى ءوزى كورگەن وقيعالارى جازىلادى. ءبىر قاۋىم ەلدىڭ قىتايدان گيمالاي اسىپ، ءۇندىستانعا ءسال تۇراقتاپ، تۇركياعا ورنىعىپ، گەرمانياعا قونىستانعانى باياندالادى. ازيادان ەۋروپاعا شىققان كوش كەزىندەگى جول ازابى مەن باسقا دا قيىندىقتار بۇكپەسىز بەرىلەدى.

ابدۋرراحمان چەتين، «كەلن قازاق مادەني ورتالىعىنىڭ» قۇرمەتتى ءتوراعاسى:

- سەگىز جاسىمنان باستاپ 83 جاسىما دەيىنگى وتكەن ءومىرىمدى تولىقتاپ، سونى جازدىم. كىتابىما كوزبەن كورگەن، قولمەن ۇستاعان شىندىقتىڭ ءبارى جازىلدى. بۇل كىتاپتى ءۇش جىلدا جازدىم.

زۋفار سەيتجانوۆ، قازاقستان جازۋشىلار وداعىنىڭ مۇشەسى، پروفەسسور:

- ءبىرىنشى تاريحي كىتاپ، ەكىنشى بۇل ابدۋرراحمان چەتين اقىن ەكەن. ولەڭدەرى قوسا بەرىلگەن. ۇشىنشىدەن بۇل ەتنوگرافيالىق سيپاتتاعى كىتاپ. فولكلورلىق سيپاتتاعى جازىلعان ولەڭدەر، ەتنوگرافيالىق قىز ۇزاتۋ، قوناق كۇتۋ دەگەن سياقتى، جوقتاۋ، سوسىن كوبىنەسە ارناۋ.

https://khabar.kz