اۋىلداعىلار قالا تۇرعىندارىنا قاراعاندا ۇزاعىراق ءومىر سۇرەدى
بۇل تۋرالى پارلامەنت ماجىلىسىندە ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى قازاقپارات ءتىلشىسى.
«بۇگىندە اۋىلدا 7,8 ميلليون ادام تۇرادى، بۇل كورسەتكىش ەل حالقىنىڭ 41 پايىزىن قۇراپ وتىر. اۋىل حالقىنىڭ ىشىندە بالالاردىڭ ۇلەسى 38 پايىز بولسا، ال قالعانى ەرەسەكتەر. بالا تۋۋ جاسىنداعى ايەلدەر 1,7 ميلليون اسىپ وتىر»، - دەدى ا. عينيات اۋىلداعى دەنساۋلىق ساقتاۋ ماسەلەسىن تالقىلاۋعا ارنالعان ۇكىمەت ساعاتىندا.
ونىڭ ايتۋىنشا، اۋىل تۇرعىندارىنا 5 مىڭنان استام مەديتسينالىق ۇيىم، ونىڭ ىشىندە 2 مىڭنان استام مەديتسينالىق پۋنكت، 800 فەلدشەرلىك- اكۋشەرلىك پۋنكت، 1000 نان استام دارىگەرلىك امبۋلاتوريا، 200 دەن استام ەمحانا جانە 203 اۋرۋحانا مەديتسينالىق كومەك كورسەتەدى.
«حالىقتىڭ دەنساۋلىق كورسەتكىشتەرىنە جۇرگىزىلگەن تالداۋعا توقتالساق، اۋىل تۇرعىندارىنىڭ ءومىر ءسۇرۋ ۇزاقتىعى قالا تۇرعىندارىنان تۇراقتى جوعارى ەكەنىن كورسەتتى»، - دەدى مينيستر.
ۆەدومستۆو مالىمەتىنە قاراعاندا، 2021 -جىلدىڭ قورىتىندىسى بويىنشا قازاقستاندا ورتاشا ءومىر ءسۇرۋ ۇزاقتىعى 70,23 جاس بولسا، قالا بۇل كورسەتكىش 69,91 جاس، ال اۋىلدا 70,79 جاس دەڭگەيىندە تىركەلدى.
