قازاقستاندا قۋعىن-سۇرگىن قۇرباندارىنىڭ تاعدىرىن ارنايى كوميسسيا زەرتتەپ جاتىر
بۇل تۋرالى ق ر مادەنيەت جانە سپورت مينيسترلىگى سيرەك كىتاپتار جانە قولجازبالار ۇلتتىق ورتالىعىنىڭ ديرەكتورى جاندوس بولدىقوۆ ءمالىم ەتتى، دەپ حابارلايدى قازاقپارات ءتىلشىسى.
«قۋعىن-سۇرگىنگە ۇشىراعان زيالى قاۋىم وكىلدەرىنىڭ تاعدىرىن زەرتتەۋمەن اينالىساتىن ارنايى كوميسسيا قۇرىلدى. اتالعان كوميسسيا مەملەكەتارالىق دەڭگەيدە جۇمىستى باستاپ كەتتى. ونىڭ قۇرامىندا 20 ادام بار. زەرتتەۋمەن اينالىساتىن كوميسسيا مۇشەلەرىنىڭ ارحيۆ، باسقا دا تاريحي دۇنيەلەر ورتالىعىنا كىرىپ جۇمىس ىستەۋگە رۇقساتى بار»، - دەدى سيرەك كىتاپتار جانە قولجازبالار ۇلتتىق ورتالىعىنىڭ ديرەكتورى جاندوس بولدىقوۆ تىلشىلەردىڭ سۇراعىنا جاۋاپ بەرە تۇرىپ.
سونداي-اق، ونىڭ ايتۋىنشا، رەپرەسسياعا ۇشىراعان زيالىلاردىڭ تاعدىرىن زەرتتەۋشىلەردىڭ جاقىن شەت ەلدەردىڭ ارحيۆىمەن جۇمىس ىستەۋىنە رۇقسات بەرىلگەن.
«الداعى ۋاقىتتا ارنايى كوميسسيا جۇمىسىنىڭ ناتيجەسىندە تىڭ دۇنيەلەر مەن اقپاراتتار پايدا بولادى دەگەن سەنىمدەمىز. ءدال قازىر كوميسسيا جۇمىسىنىڭ ناتيجەسى تۋرالى ايتۋعا ەرتە. سەبەبى زەرتتەۋ جۇمىستارى ءجۇرىپ جاتىر. جۇمىستى قورىتىندىلاي كەلە ۇلكەن ءبىر جيناق نەمەسە مونوگرافيا شىعىپ قالار»، - دەيدى ول.
بۇعان دەيىن حابارلاعانىمىزداي ەلورداداعى سيرەك كىتاپتار جانە قولجازبالار ۇلتتىق ورتالىعىندا (نۇرجول 12) «الجير» مەموريالدى كەشەنى قىزمەتىنە ارنالعان كورمە اشىلدى.
اۆتور
داۋلەت ىزتىلەۋ
