پرەزيدەنتتىككە ۇمىتكەر قاسىم- جومارت توقايەۆتىڭ قۇجاتتارى تاپسىرىلدى – و س ك

استانا. قازاقپارات - قاسىم- جومارت كەمەل ۇلى توقايەۆتىڭ قازاقستان رەسپۋبليكاسىنىڭ پرەزيدەنتتىگىنە كانديدات رەتىندە قۇجاتتارى ۇسىنىلدى. بۇل تۋرالى ورتالىق سايلاۋ كوميسسياسى ءمالىم ەتتى، دەپ حابارلايدى قازاقپارات.

ورتالىق سايلاۋ كوميسسياسىنىڭ اقپاراتتىق حابارىندا بىلاي دەپ جازىلعان:

«2022 -جىلعى 7-قازاندا «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ 54-جانە 55-باپتارىنا سايكەس، سونداي- اق «2022 -جىلعى 20-قاراشاعا تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى بويىنشا سايلاۋ قۇجاتتارىنىڭ نىساندارىن بەلگىلەۋ تۋرالى» قازاقستان رەسپۋبليكاسى ورتالىق سايلاۋ كوميسسياسىنىڭ 2022 -جىلعى 23 -قىركۇيەكتەگى № 67/545 قاۋلىسىنا سايكەس قازاقستان رەسپۋبليكاسىنىڭ ورتالىق سايلاۋ كوميسسياسىنا قاسىم- جومارت كەمەل ۇلى توقايەۆتىڭ قازاقستان رەسپۋبليكاسىنىڭ پرەزيدەنتتىگىنە كانديدات ەتىپ ۇسىنۋ تۋرالى كەلەسى قۇجاتتارى ۇسىنىلدى:

1. «AMANAT» پارتياسى، قازاقستان حالىق پارتياسى، «اق جول» قازاقستاننىڭ دەموكراتيالىق پارتياسى»، «ارداگەرلەر ۇيىمى»، «QAZAQSTAN TEAM»، «قازاقستان ءماسليحاتتارى دەپۋتاتتارىنىڭ بىرلەستىگى»، «گەنەرالدار كەڭەسى»، «قازاقستاندىق سپورتشىلار وداعى» رەسپۋبليكالىق قوعامدىق بىرلەستىكتەرىنىڭ جوعارى ورگاندارى وتىرىستارىنىڭ قازاقستان رەسپۋبليكاسىنىڭ پرەزيدەنتتىگىنە ۇسىنۋ تۋرالى حاتتامالارىنان ءۇزىندى كوشىرمەلەرى؛

2. ق. ك. توقايەۆتىڭ قازاقستان رەسپۋبليكاسىنىڭ پرەزيدەنتتىگىنە كانديدات بولۋعا كەلىسىمى تۋرالى، ءومىرباياندىق دەرەكتەرى قوسا بەرىلگەن ءوتىنىشى؛

3. قازاقستان رەسپۋبليكاسى ورتالىق سايلاۋ كوميسسياسىنىڭ شوتىنا سايلاۋ جارناسىنىڭ ەنگىزىلگەنىن كۋالاندىراتىن قۇجات؛

4. جەكە باسىن كۋالاندىراتىن قۇجاتتىڭ كوشىرمەسى؛

5. جوعارى ءبىلىمى تۋرالى ديپلومداردىڭ كوشىرمەلەرى».