لوندونعا ساياحات: تۋريسكە ارنالعان ماڭىزدى كەڭەستەر

استانا. قازاقپارات - لوندون - تاماشا قالا، سونىمەن قاتار الەمنىڭ بۇكىل ساياسي ەليتاسى عانا ەمەس، بيزنەسمەندەر ۇمتىلاتىن الەمدەگى ەڭ قىمبات مەگاپوليستىڭ ءبىرى.

لوندوندا ساياحاتتاۋ - كونە زامانمەن، تەرەڭ تاريحپەن، سونداي-اق بۇگىنگىنىڭ جەتىستىكتەرىمەن بايلانىستا بولۋ مۇمكىندىگىن بەرەدى.

لوندون قوناق ۇيلەرى ءسىزدى كەز كەلگەن قالارالىق تۋريست ءۇشىن جەتكىلىكتى جوعارى قىزمەت كورسەتۋ دەڭگەيىمەن تاڭ قالدىرادى.

لوندون بەس حالىقارالىق اۋەجايى مەن ۇلكەن پورتى بار حالىقارالىق كولىك تورابى. انگليا استاناسى الەمدەگى ەڭ ءىرى اۆياتسيالىق ورتالىق بولىپ سانالادى جانە ونىڭ نەگىزگى اۋەجايى حيتروۋ باسقا اۋەجايلارعا قاراعاندا حالىقارالىق جانە ىشكى جولاۋشىلارعا كوبىرەك قىزمەت كورسەتەدى.

لوندون عاسىرلار بويى تۋريستەردىڭ سۇيىكتى ورنى. مۇندا كوپتەگەن كورىكتى جەرلەر مەن ەسكەرتكىشتەر بار. بۇل جەردەن پارلامەنت ۇيلەرى، تاۋەر كوپىرى، لوندون مۇناراسى، ۆەستمينستەر ابباتتىعى، بۋكينگەم سارايى جانە تەمزا جاعالاۋىنداعى اتاقتى لوندون «كوزىن»، سونداي-اق ۇلتتىق مۇراجاي مەن بريتان مۇراجايى سياقتى ايگىلى ورىنداردى كورە الاسىز.

لوندونعا ساياحاتتاۋ ءۇشىن ۆيزا كەرەك

لوندونعا ۆيزا الۋ ءۇشىن قۇجاتتار پاكەتىن تولتىرۋ قاجەت. ەلشىلىكتىڭ سىزگە رۇحسات بەرۋى قۇجاتتاردىڭ قانشالىقتى دۇرىس تولتىرىلعانىنا بايلانىستى. ونلاين ساۋالناما تولتىرۋ كەزىندە قاتە جىبەرمەۋ ماڭىزدى. ساۋالنامانى مىنا جەردەن تولتىرۋعا بولادى.

ۆيزا ءۇشىن:

• جارامدى ءتولقۇجات؛

• بۇرىنعى ۆيزالاردىڭ كوشىرمەلەرى (بار بولسا)؛

• ونلاين ساۋالنامانى تولتىرۋ كەرەك. بۇل جەردە ءسىز جەكە اقپاراتتارىڭىزدى تولتىرىپ، بەرىلگەن سۇراقتارعا اعىلشىنشا جاۋاپ بەرەسىز؛

• قوناق ءۇيدى برونداۋ (مىنا جەردەن برونداۋعا بولادى)؛

• اۋە بيلەتتەرىن ەكى جاققا برونداۋ؛

• لاۋازىمى، جالاقىسى جانە جۇمىس كەزەڭى كورسەتىلگەن كومپانيانىڭ بلانكىسىندە جۇمىس ورنىنان انىقتاما (اعىلشىن تىلىندە نەمەسە اعىلشىن تىلىنە اۋدارىلعان)؛

• كومپانيانىڭ بلانكىسىندە سوڭعى 6 ايداعى جالاقى تۋرالى انىقتاما (اعىلشىن تىلىندە نەمەسە اعىلشىن تىلىنە اۋدارىلعان)؛

• ءوز كاسىبىنىڭ يەلەرى ءۇشىن: جەكە كاسىپكەردى نەمەسە جاۋاپكەرشىلىگى شەكتەۋلى سەرىكتەستىكتى تىركەۋ تۋرالى انىقتاما، سالىق بەرەشەگىنىڭ جوقتىعى تۋرالى انىقتاما (اعىلشىن تىلىندە نەمەسە اعىلشىن تىلىنە اۋدارىلعان)؛

• وقۋشىلار مەن ستۋدەنتتەر ءۇشىن: وقۋ ورنىنان انىقتاما (اعىلشىن تىلىندە نەمەسە اعىلشىن تىلىنە اۋدارىلعان)؛

• زەينەتكەرلەر ءۇشىن: زەينەتاقى كۋالىگى (اعىلشىن تىلىندە نەمەسە اعىلشىن تىلىنە اۋدارىلعان)؛

• تۇرۋ كۇنىنە 100 ەۋرو مولشەرىندە قاراجاتتىڭ بولۋى تۋرالى بانكتەن انىقتاما (اعىلشىن تىلىندە نەمەسە اعىلشىن تىلىنە اۋدارىلعان)؛

• كەيىنگى 6 ايداعى شوت بويىنشا ءۇزىندى كوشىرمە؛

• جەكە قۇجاتتاردىڭ كوشىرمەلەرى: نەكە / اجىراسۋ تۋرالى كۋالىك، كامەلەتكە تولماعان بالالاردىڭ تۋۋ تۋرالى كۋالىگى (اعىلشىن تىلىندە نەمەسە اعىلشىن تىلىنە اۋدارىلعان)؛

تۋريستىك ۆيزا 116 دوللاردان باستالادى جانە تاپسىرعاننان سوڭ كەم دەگەندە 15 كۇن ىشىندە بەرىلەدى. ەگەر جەدەل ۆيزا العىڭىز كەلسە 956 فۋنت ستەرلينگ تولەيسىز. ءبىراق ونىڭ جەڭىلدەتىلگەن ءتۇرى (كۆوتا) بار. ونىڭ سانى شەكتەۋلى. باعاسى 250 فۋنت ستەرلينگ. جەڭىلدەتىلگەن ءتۇرىن الۋ ءۇشىن تاڭعى 06:00 دەن باستاپ ساۋالناما تولتىرىلعان سايتتى جاڭارتىپ وتىرۋ قاجەت. جەدەل ۆيزا 5 كۇن ىشىندە بەرىلەدى.

بۋكينگەم سارايى

لوندوندا ساياحاتتاۋ قىمبات پا؟

ۇلى بريتانيا استاناسىن الەمدەگى ەڭ قىمبات قالالاردىڭ ءبىرى دەيدى. دەگەنمەن، ىزدەنىمپاز ءارى تاۋەلسىز تۋريست ءۇشىن لوندوندا ءتيىمدى دە تاماشا ۋاقىت وتكىزۋ قيىنعا سوقپايدى. ول ءۇشىن ءسىز مەترو مەن اۆتوبۋستا جۇرەتىن كارتا ساتىپ الساڭىز بولادى.

سونداي كارتالاردىڭ ءبىرى - Oyster Card. بۇل مەترو، ​​اۆتوبۋس، ترامۆاي، پويىز، سۋ اۆتوبۋستارى مەن اسپالى كولىكتەرگە ارنالعان ەلەكتروندى ءاميان. بۇل كارتامەن ساياحاتتاۋ بيلەتتەردى قولما-قول تولەۋدەن ەكى ەسە ارزان. كارتانىڭ ءوزى 7 فۋنت ستەرلينگ تۇرادى.

قايدان ساتىپ الۋعا بولادى؟

Oyster كارتاسىن ونلاين رەجيمىندە (ەگەر ءسىز ۇلى بريتانيادا بولساڭىز)، ارنايى ساۋدا نۇكتەلەرىنەن، Tube، Skytrain جانە TfL تەمىرجول ستانسيالارىندا، تاڭداۋلى DLR جانە ۇلتتىق تەمىرجول ستانسيالارىندا، تۋريستىك اقپارات ورتالىقتارىندا جانە كرويدونداعى Tramlink كەڭسەسىندە ساتىپ الۋعا بولادى.

كارتانى جوعارىدا اتالعان ساۋدا نۇكتەلەرىندە، فيرمالىق بيلەت اۆتوماتتارىندا، اسپالى كولىك تەرمينالدارىندا، سونداي-اق iOS جانە Android ءۇشىن قولجەتىمدى رەسمي موبيلدى قوسىمشا ارقىلى تولتىرۋعا بولادى.

Oyster كارتاسى جەكە ەمەس جانە ونى باسقا ادامعا بەرۋگە بولادى، ءبىراق ەكى ادامنىڭ ءبىر كارتانى ءبىر ۋاقىتتا پايدالانۋىنا بولمايدى.

بۇل كارتانىڭ ءبىر كۇندىك نەمەسە ءبىر اپتالىق تاريفتەرى بار. زونالارعا قاراي ءبىر كۇنگە 5،20 فۋنت ستەرلينگ، ءبىر اپتاعا 20،90 فۋنت ستەرلينگ تولەيسىز.

لوندون ارزان قالا ەمەس ەكەنىنە قاراماستان، مۇندا كوپتەگەن قالالىق تۋرلار تەگىن. كەلەسى ۇيىمدار قالامەن مۇلدەم تەگىن تانىسۋدى ۇسىنادى: Footprints tours، Free London walking tours، Free tours of London Sandeman’s New Europe Tours، Alternative London ۇيىمدارىنىڭ سايتتارىندا كەستە مەن ناقتى مەكەنجايدى تابا الاسىز.

تەگىن مۇراجايلار

ءسىز قازىر تاڭ قالۋىڭىز مۇمكىن، ءبىراق لوندوننىڭ مەملەكەتتىك مۇراجايلارىنا كىرۋ تەگىن.

لوندوننىڭ بۇرىن قانداي بولعانىن ءبىلۋ ءۇشىن ۋاقىت ماشيناسىنىڭ بولۋى مىندەتتى ەمەس - جاي عانا وسى مۇراجايعا كەلىڭىز جانە قالانىڭ كوپ عاسىرلىق تاريحىندا باسىنان وتكەن وزگەرىستەردى كورسەتەتىن تاماشا ەكسپوزيتسيانى كورىڭىز.

ۇلتتىق گالەرەياداعى ۆانگ گوگ كارتيناسى

ۇلتتىق گالەرەيا. ۇلتتىق گالەرەيا 1856-جىلى اشىلعان، سودان بەرى زالدارىندا اتى اڭىزعا اينالعان شەبەرلەردىڭ اسەرلى كارتينالارىن جيناعان. مىسالى، ءدال وسى جەردەن شەكسپيردىڭ ايگىلى پورترەتى مەن كلود مونەنىڭ، ۆانگ گوگتىڭ كارتينالارىن تاماشالاۋعا بولادى.

ۆيكتوريا مەن البەرت مۇراجايى. تاعى ءبىر رەكوردتى مۇراجاي. بۇل الەمدەگى ەڭ ۇلكەن ونەر جانە ديزاين مۇراجايى جانە 3000 جىلدان استام تاريحتىڭ كەرەمەت جادىگەرلەرىن جيناعان. تۇراقتى كورمەدەن باسقا، مۇراجايدا كەز كەلگەن ادام قاتىسا الاتىن اشىق دارىستەر مەن سەمينارلار ءجيى وتكىزىلەدى.

لوندونداعى بازارلار

لوندونداعى بازارلار مۇراجايلار سياقتى وتە تانىمال. ءارقايسىسىنىڭ وزىندىك ەرەكشە سيقىرلى اتموسفەراسى بار جانە ولارداعى ساۋدا بريتاندىق مادەنيەتپەن جانە كۇندەلىكتى ومىرمەن بايلانىستى.

گرينۆيچ بازارى - انتيكۆاريات پەن كوكونىس قاتار جۇرەتىن ەۋروپاداعى ەڭ كونە بازارلاردىڭ ءبىرى.

بورو بازارى - ەۋروپاداعى ەڭ جاقسى نارىقتى ۇسىناتىن بازاردىڭ ءبىرى.

كامدەن - بۇل ءۇش بازار ءبىر ورىندا تۇيىسەتىن ايماق، بۇل جەرگە تۋريستەر ادەتتە كيىم-كەشەك ءۇشىن كەلەدى.

پورتوبەللو - بۇل باراحولكا مەن ءساندى بۋتيكتەردىڭ ءبىرتۇرلى قوسپاسى، مۇندا ءسىز كەز كەلگەن تالعامعا ساي تاۋارلاردى تابا الاسىز.

تاعى ءبىر ايتا كەتەرلىگى، لوندونعا ساياحاتتاپ بارعاسىن ونىڭ ايگىلى وكسفورد-ستريت (Oxford Street) كوشەسىندە ورنالاسقان ساۋدا ورنىندارىن ارالاۋ كەرەك.

لوندونداعى ساياباقتار

لوندون ءوزىنىڭ سۇيكىمدى ساياباقتارىمەن تانىمال، مۇندا ءسىز ەركىن كەلىپ، پيكنيك جاساي الاسىز. ورتالىقتان الىستاعىڭىز كەلمەسە گرين-پارك (Green Park)، مىڭ جىلدىق تاريحى بار گايد-پارك (Hyde Park)، كينگستون باقشاسىنا بارا الاسىز.

لوندون سيتي

لوندون سيتي - «قالا» مارتەبەسى بار اكىمشىلىك-اۋماقتىق قۇرىلىم، ۇلكەن لوندون ورتالىعىنداعى سالتاناتتى وكرۋگ، لوندوننىڭ تاريحي وزەگى، ەجەلگى ريم قالاسىنىڭ لوندينيۋم نەگىزىندە قۇرىلعان.

لوندينيۋم (لات. Londinium، قازىرگى لوندون) - ءبىزدىڭ زامانىمىزدىڭ ب. ز. ب 43-جىلى ريمدىكتەر نەگىزى قالاعان قالا. ول Ⅱ عاسىر مەن ريمدىكتەر جەڭىلگەن V عاسىرعا دەيىن ريم يمپەرياسىنىڭ نەگىزگى ساۋدا جانە بيلىك ورتالىعى بولدى. لوندينيۋم تەمزا وزەنىندە ورنالاسقاندىقتان بۇل وعان تەڭىزگە دە، ۇلىبريتانيانىڭ ىشكى ايماعىنا دا قوسىلۋدى قامتاماسىز ەتتى.

لوندون سيتيدەن كوركتى ەسكى مەن زاماناۋي عيماراتتاردىڭ اسەم قوسىندىسىن كورە الاسىز. لوندون سيتي بەينە ءبىر تاستان قالانعان لابيرينت سەكىلدى. تاستان دەيتىنىمىز، قالا العاشقى كەزدە اعاشتان سالىنعان. ءبىراق 1212 مەن 1666-جىلعى ورتتەر قالانىڭ ايتارلىقتاي دامۋىنا ۇلەس قوستى. 1666-جىلعى ءورت كەزىندە 13200 دەن ارتىق عيماراتتار مەن ۇيلەر ورتەنىپ كەتكەن. 4 كۇن جالىنعا ورانعان قالانىڭ نەگىزگى بولىگى كۇلگە اينالعان. ءبىراق 6-اق ادام قايتىس بولىپتى. وسى ورتتەن كەيىن لوندون ناعىز مادەنيەت ورتالىعىنا، زاماناۋي قالاعا اينالدى. سەبەبى الاپات ءورتتىڭ قايتالانۋىنان قورىققان قالا اكىمشىلىگى جاڭا عيماراتتاردى تەك تاستان قالاي باستاعان.

بيگ بەن

بيگ بەن ساعات مۇناراسى - الەمگە اتى ءماشھۇر الىپ مۇنارالاردىڭ ءبىرى. اتاقتى مۇنارانىڭ ۇزىندىعى - 96 مەتر. سوندىقتان دا الەم بويىنشا ەڭ الىپ ساعات بولىپ ەسەپتەلەدى. قۇرىلىسى 1843-جىلى باستالىپ، 1856-جىلى ىسكە قوسىلعان. 2012-جىلدان باستاپ ساعات اتى - «II ەليزاۆەتا مۇناراسى» دەپ وزگەرتىلدى.

ساعاتتىڭ ءتورت سيفەربلاتىندا لاتىن تىلىندە مىناداي جازۋلار جازىلعان: «Domine salvam fac Reginam nostram Victoriam Primam« (ە، قۇداي، ءبىزدىڭ حانىمىمىز ءبىرىنشى ۆيكتوريانى قورعاي گور!)

لوندونعا بارىپ كەلۋ قانشا تۇرادى؟

«ەير استانا» الماتىدان لوندونعا (حيتروۋ) تىكەلەي رەيستەردى ورىندايدى. لوندونعا ۇشىپ بارۋ وڭاي. سەبەبى، اۋە كومپانياسىنىڭ جاڭا ۇشاعى - قاۋىپسىز ءارى جايلى Airbus A321 LR اۋە كەمەسى. الماتى - اقتاۋ - حيتروۋ باعىتىمەن ۇشقان ۇشاق اقتاۋعا 1 ساعاتتاي نە ودان از ايالداپ، جانارماي قۇيىپ الادى. حيتروۋعا دەيىن 6،5 ساعات ۇشادى.

ەكونوم كلاسىنداعى مينيمالدى تاريف - 299582 تەڭگەدەن باستالادى. بۇل لوندونعا بارىپ كەلۋ قۇنى.

ۇشاقتا ءىش پىسۋ مۇمكىن ەمەس. الىپ اۋە كەمەسىنىڭ ورىندىعى جايلى، مۋلتيمەديالىق ەكرانمەن جابدىقتالعان. فيلم كورىپ، اۋەن تىڭداۋعا، تەلەباعدارلامالار تاماشالاۋعا بولادى. ەكى ۋاقىت اس-اۋقات پەن جول جيناعى بەرىلەدى.

بيلەتتى airastana.com سايتىندا نەمەسە Air Astana موبيلدى قوسىمشاسىندا سەرىكتەس بانكتەردەن ونلاين نەسيەگە ساتىپ الۋعا بولادى.

موبيلدى بايلانىس

جەرگىلىكتى (PAYG) SIM كارتانى ساتىپ الۋ لوندوندا ۇزاق تۇراقتاپ قالاتىندار ءۇشىن حالىقارالىق روۋمينگتەن گورى الدەقايدا ءتيىمدى. ونى پايدالانعان كەزدە تەلەفون قۇلپىن اشۋ قاجەت بولادى. مۇنى جەرگىلىكتى ۇيالى بايلانىس وپەراتورلارىنىڭ - T- Mobile، VOXI (Vodafone ىشكى جەلىسى)، Orange، O2، Three، Giffgaff، Virgin Mobile ساتۋ نۇكتەلەرىنىڭ بىرىندە جاساۋعا بولادى.

ال تۋريستەر ءۇشىن روۋمينگ قولدانسا دا بولادى. سەبەبى، جەرگىلىكتى وپەراتور قىزمەتى مەن ءوزىڭىز بارعان ەلدىڭ روۋمينگ قىزمەتىنىڭ اقىسى شامامەن بىردەي. ءوز ەلىڭىزدىڭ وپەراتور قىزمەتى بەرگەن تەگىن ينتەرنەت پەن تەگىن مينۋتتار 5-6 كۇنگە جەتەدى.

P. S. ءسوز سوڭىندا ايتارىمىز لوندونعا تۋريست بولىپ بارعاننان كەيىن مىندەتتى تۇردە ينتەرنەت قىزمەتى كەرەك. سەبەبى ءسىز جۇرگەن جەرىڭىزدە ۇنەمى كارتانى پايدالاناسىز. بۇل سمارتفون قۋاتىنىڭ تەز تاۋسىلۋىنا الىپ كەلەدى. سوندىقتان ەلدەن شىعاردا مىندەتتى تۇردە power bank ساتىپ الىڭىز. لوندوندا ونىڭ قۇنى شامامەن 50 فۋنت ستەرلينگ (26 مىڭ تەڭگە) تۇرادى.

لوندوندا ءجۇرىپ كەلەڭسىز جاعدايعا تاپ بولساڭىز نەمەسە پاسپورت جوعالتىپ الساڭىز ۇلى بريتانياداعى قازاقستان ەلشىلىگىندەگى مىنا نومەرگە: 4407570654654+ حابارلاسۋىڭىزعا بولادى.

ت. راۋشان ۇلى

massaget.kz