ۇشاقتار نەگە رەيسكە كەشىگىپ شىعادى - يندۋستريا ءمينيسترى پىكىر ءبىلدىردى

استانا. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ ۇشاقتاردىڭ اۋەجايدان كەشىگىپ شىعۋى ماسەلەسىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«جاز كەزىندە ۇشاقتاردىڭ كەشىگۋى ءجيى كەزدەستى. سوڭعى كەزدە كەشىگۋ وقيعالارى جاپپاي سيپاتتا ەمەس. ءار وسىنداي وقيعا بويىنشا قاتاڭ باقىلاۋ جۇرگىزىلەدى. ادامدار كومپانيا ءۇشىن 3 ميلليون تەڭگە سوماسىنداعى ايىپپۇل ەشقانداي اۋىرتپالىق ەمەس دەپ ايتۋى مۇمكىن. ەگەر قاتارىنان بىرنەشە رەت ايىپپۇل سالساڭ، وندا ولار جاعدايدى تۇزەتۋگە ارەكەت ەتە باستايدى. بۇل رەتتە مەملەكەتتىڭ سالاداعى كەمشىلىكتەردى تۇزەتۋگە باعىتتالعان قادامدارىنىڭ وڭتايلى ناتيجەسى كورىنىپ وتىر. سوندىقتان ولار ءوز جۇمىسىن دۇرىس جاعىنا قاراي قۇرىلىمداي باستادى»، - دەدى ق. وسكەنبايەۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

سونىمەن قاتار ول ۇشاقتاردىڭ تەحنيكالىق سەبەپتەرگە بايلانىستى دا كەشىگۋى مۇمكىن ەكەنىن، وسى ورايدا جولاۋشىلار شىدامىلىق تانىتۋى كەرەك ەكەنىن ايتتى.

«Air Astana كومپانياسى الەمدىك تالاپتارعا ساي ەكەنى بەلگىلى. ۇشاقتاردىڭ رەيسكە كەشىگىپ شىعۋى تەحنيكالىق سەبەپتەرگە قاتىستى بولىپ جاتادى. وسى ورايدا تەحنيكالىق سەبەپتەر ءتۇرلى سيپاتتا انىقتالادى، ياعني ۇشاققا قۇستاردىڭ سوعىلۋى نەمەسە داتچيكتىڭ ىستەن شىعۋى سەكىلدى جاعدايلار بولادى. بۇل تۇرعىدا Air Astana ۇشاقتىڭ تەحنيكالىق جاساقتالۋىنا 100 پايىز سەنىمدى بولعان جاعدايدا عانا ساپارعا شىعادى. سوندىقتان ۇشاق كەشىگىپ جاتسا، وندا شىدامدىلىق تانىتۋعا شاقىرامىن. ويتكەنى بۇل جۇمىستار جولاۋشىلاردىڭ قاۋىپسىزدىگى ءۇشىن جۇرگىزىلەدى»، - دەدى مينيستر.