قۇرىلىس نىساندارىنا «ج س ن» بەرىلەدى - ۇكىمەت وتىرىسى

استانا. قازاقپارات – ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ قالالارداعى قۇرىلىس نىساندارىنىڭ ءبىرىڭعاي كاداسترلىق ءنومىرى تۇزىلەتىنىن ايتتى، دەپ حابارلايدى قازاقپارات ءتىلشىسى.

«قالا قۇرىلىسى كاداسترى قالا قۇرىلىسى قىزمەتىنىڭ اشىقتىعىن، قالا قۇرىلىسى جوبالارىن ازىرلەۋ مەن ىسكە اسىرۋدىڭ سايكەستىگىن قامتاماسىز ەتۋگە مۇمكىندىك بەرەدى.

ول ءۇشىن ءبىز وبەكتىنىڭ بىرەگەي ءنومىرىن ەنگىزۋدى پىسىقتاپ جاتىرمىز.

بۇل بىرىزدەندىرۋ، جەكە سايكەستەندىرۋ نومىرمەن ۇقساستىعى بويىنشا ساۋلەت- جوسپارلاۋ تاپسىرماسىن بەرۋدى، ادامي فاكتوردى بولدىرماي، باس جوسپارلارعا جانە ەگجەي- تەگجەيلى جوبالاۋ جوسپارلارىنا سايكەس جۇيەدە ەسكيزدىك جوبانى كەلىسۋدى قامتاماسىز ەتەدى»، - دەدى مينيستر ۇكىمەت وتىرىسىندا.

سونداي-اق ول قۇرىلىس نىساندارىنىڭ قۇجاتتارى تۇگەل تەكسەرىلەتىنىن ءمالىم ەتتى.

«قۇجاتتاردىڭ نىسانالى ماقساتقا سايكەستىگىنە تۇپكىلىكتى تەكسەرۋدى جۇرگىزۋگە مۇمكىندىك بەرەدى»، - دەدى قايىربەك وسكەنبايەۆ.