رەسەيلىك دارىگەر ەلدەن قۋىلدى

استانا. قازاقپارات - ىشكى ىستەر مينيسترلىگى ەلدەن شىعارىلعان رەسەيلىك دارىگەر جايىندا مالىمەت تاراتتى، دەپ حابارلايدى قازاقپارات.

ايتا كەتەيىك، الەۋمەتتىك جەلىدە رەسەيلىك دارىگەردىڭ ەلدەن شىعارىلۋى جونىندە اقپارات شىقتى.

الماتى قالاسى پ د كوشى- قون قىزمەتى باسقارماسىنىڭ مالىمەتىنشە، 23 - قىركۇيەك كۇنى ر ف ازاماتى رومان الفەروۆ «قورداي اۆتو» باقىلاۋ- وتكىزۋ پۋنكتىندە شەكارا قىزمەتكەرلەرىنە تاپسىرىلعان.

«ناۋرىزباي اۋداندىق سوتىنىڭ 2021 -جىلعى 27 - شىلدەدەگى شەشىمىمەن الماتى قالاسى پ د المالى اۋداندىق پ ب ارىزى بويىنشا قازاقستان زاڭناماسىن بۇزعان رەسەي ازاماتى رومان الفەروۆ قازاقستان شەكاراسىنان شىعارىلدى. سوت شەشىمىن ءوز ەركىمەن ورىنداۋعا 10 كۇن مەرزىم بەرىلگەن، الايدا وسى ۋاقىت ىشىندە شەتەلدىك ازامات ءارتۇرلى جولدارمەن سوت شەشىمىن ورىنداۋدان جالتارعان، ياعني بىرنەشە رەت كاسساتسيالىق شاعىم بەرگەن، ستاتسيوناردا ەمدەلگەن. سونىمەن قاتار ول قازاقستاندا بولعان كەزىندە بىرنەشە رەت اكىمشىلىك جاۋاپكەرشىلىككە جانە ءبىر رەت قىلمىستىق جاۋاپكەرشىلىككە تارتىلعان»، - دەدى الماتى قالالىق پ د كوشى- قون قىزمەتى باسقارماسىنىڭ باستىعى اسحات بۋتۋنچينوۆ.

ەسكە سالا كەتەيىك، رومان الفەروۆ 2019 -جىلى پاتسيەنت ولىمىنە كىنالى دەگەن ايىپپەن سوتقا تارتىلعان بولاتىن.

سوت ۇكىمىمەن حيرۋرگ 2,5 جىلعا باس بوستاندىعىنان ايىرىلعان. الايدا قىلمىس جاسالعاننان بەرى ءۇش جىلعا جۋىق ۋاقىت ءوتىپ كەتكەندىكتەن ول بوساتىلدى.

فوتو: alferov.kz

رەداكتور

جانات قاپالبايەۆا