ۇلى دالا جورىعى شاباندوزدارى مارافون-بايگەنىڭ سوڭىنا تاياپ قالدى - فوتو
شاباندوزدار سوزاق اۋدانى، قاراتاۋ اۋىل وكرۋگى، سارىجاز ەلدى مەكەنىنە ات باسىن تىرەدى. ەندى ات اياعىن سۋىتىپ، تاڭەرتەڭ قايتا جولعا شىعادى. بۇگىنگى جارىستا العاش بولىپ مارەگە تۇركىستان وبلىسىنىڭ شاباندوزدارى جەتتى. اقتوبە وبلىسى مەن ماڭعىستاۋ وبلىسى ەكىنشى، ءۇشىنشى بولىپ مارە سىزىعىن قيدى. ءتورتىنشى بولىپ قىزىلوردا وبلىسى كەلدى. قالعان 4 كوماندا جارىس جولىندا.
تۇركىستان وبلىسى كومانداسىنىڭ جەتەكشىسى المات ايتجان ءدۇبىرلى دودانىڭ ماڭىزى، سايىستاعى ناتيجەلەرى تۋرالى ايتىپ ءوتتى.
«ەلوردامىز استانادان باستاۋ العان مارافون-بايگەنىڭ سوڭىنا دا تاياپ قالدىق. تۇلپارلار تۋعان جەردىڭ توپىراعىنا اياق ارتقان سوڭ جىلدامدىعىن دا ۇدەتىپ كەلەدى. كەشە مارافون- بايگەنىڭ 9-كۇنى 1-كەلدىك. مىنە، بۇگىنگى جارىس كۇنى دە العاش بولىپ مارە سىزىعىن قيدىق. جالپى ەسەپتە كوماندالىق جاعدايىمىزدى جاقسارىپ كەلەدى. بۇل جەردىڭ ساي-قىرى، اتقا دا شاباندوزعا دا تانىس. سوندىقتان ناتيجە دە ارتىپ كەلەدى»، - دەيدى اتبەگى.
جارىستىڭ بەلسەندى كورەرمەنى، قاراتاۋ اۋىل وكرۋگىنىڭ تۇرعىنى ەلمۇرات كەرىمحان تۇركىستاندىق شاباندوزدارعا ساتتىلىك تىلەپ، ىزگى لەبىزىن ءبىلدىردى.
«مارافون- بايگە باستالدى دەگەلى ەكى كوزىمىز ءتورت بولىپ، شاباندوزداردى كۇتىپ ءجۇرمىز. جەرلەستەرىمىزگە جانكۇيەرلىك ەتىپ، سولاردىڭ تىلەۋىن تىلەپ وتىرمىز. كەشە دە تايقوڭىر ەلدى مەكەنىندە ولاردى كۇتىپ العانبىز. بۇگىن دە ارنايى كەلدىك»، - دەيدى سپورت جاناشىرى.
ايتا كەتسەك، جارىس جولىنداعى 8 كوماندا بۇگىن وسىندا تىنىعادى. ەرتەڭ شولاققوران اۋىل وكرۋگى، اباي ەلدى مەكەنىنە قاراي 100 شاقىرىمدىق جارىس جولىنا شىعادى.
