توقايەۆ شىمكەنتتە وقۋشىلار سارايى مەن وپەرا جانە بالەت تەاترىن سالۋدى تاپسىردى

استانا. قازاقپارات - شىمكەنتتە جاڭا وقۋشىلار سارايى مەن وپەرا جانە بالەت تەاترى سالىنادى. مۇنداي تاپسىرمانى مەملەكەت باسشىسى قاسىم-جومارت توقايەۆ جۇكتەدى، دەپ حابارلايدى قازاقپارات ءتىلشىسى.

شىمكەنت جۇرتشىلىعىمەن كەزدەسۋدە پرەزيدەنت الەۋمەتتىك ينفراقۇرىلىمدى دامىتۋعا نازار اۋداردى.

«مەن وسى جىلدى «بالالار جىلى» دەپ جاريالادىم. وسىعان بايلانىستى ەلىمىزدە ءبىرقاتار اۋقىمدى ءىس-شارا اتقارىلدى. شىمكەنتتە وقۋشىلار سارايى جانە بالالار شىعارماشىلىق ورتالىعى سالىنىپ جاتىر. ءبىراق، بۇل جەتكىلىكسىز. قالانىڭ دەموگرافيالىق ءوسىمىن ەسكەرە وتىرىپ، اكىمدىككە 2025-جىلعا دەيىن تاعى ءبىر وقۋشىلار سارايىن سالۋدى تاپسىرامىن»، - دەدى قاسىم-جومارت توقايەۆ شىمكەنت جۇرتشىلىعىمەن كەزدەسۋ بارىسىندا.

مەملەكەت باسشىسى شىمكەنتتە 5 جىلدىڭ ىشىندە 101 مەكتەپ سالۋ جوسپارلانعانىن اتاپ ءوتتى.

«بۇل جۇمىسقا بيزنەس وكىلدەرى بەلسەنە اتسالىسىپ جاتىر. قالادا سوڭعى ەكى جىلدا 50 جەكەمەنشىك مەكتەپ اشىلدى. وسى ءوڭىردىڭ كاسىپكەرلەرى كوپتەگەن مەكتەپ سالىپ، ءبىلىم سالاسىنا زور ۇلەس قوسىپ جاتىر. اكىمدىك الداعى جىلى ءۇش اۋىسىمدى مەكتەپ ماسەلەسىن تولىعىمەن شەشۋگە ءتيىس»، - دەدى مەملەكەت باسشىسى.

قاسىم-جومارت توقايەۆ مادەنيەت سالاسى دا مەملەكەتتىڭ باستى نازارىندا ەكەنىن جەتكىزدى.

«قازىر قالادا اۋقىمدى ءىس-شارالار وتكىزەتىن مادەنيەت وشاعى تاپشى. مەنىڭ تاپسىرمام بويىنشا 2 مىڭ ورىندىق كونگرەسس حوللدىڭ قۇرىلىسى باستالدى. بۇل نىسان كەلەسى جىلى پايدالانۋعا بەرىلەدى. قالادا وپەرا جانە بالەت تەاترى بار. الايدا، ونىڭ عيماراتى تالاپقا ساي ەمەس. سوندىقتان، ۇكىمەتكە شىمكەنتتە وپەرا جانە بالەت تەاترىن سالۋدى تاپسىرامىن»، - دەدى پرەزيدەنت.