قازاقستان ۇكىمەتى ساۋد ارابياسىمەن تۋريزم، اۆياتسيا سالالارىن دامىتۋدى تالقىلادى
قازاقپارات بۇل تۋرالى primeminister.kz سايتىنا سىلتەمە جاساپ حابارلايدى.
پرەمەر-مينيستر وتكەن جىلدار ىشىندە قازاقستان رەسپۋبليكاسى مەن ساۋد ارابياسى اراسىندا دوستىق جانە سىندارلى قاتىناس ورناعانىن اتاپ ءوتتى.
«الەم مۇسىلماندارى قاجىلىق پارىزىن وتەۋدى اسىعا كۇتەدى. بيىل 4 مىڭ وتانداسىمىز دا وسىنداي مۇمكىنشىلىككە يە بولدى. بۇعان ساۋد ارابياسى باسشىلىعىنىڭ نازارى مەن كۇش-جىگەرىنىڭ ارقاسىندا قول جەتكىزىلدى»، - دەدى ءاليحان سمايىلوۆ.
سونداي-اق ول استانادا وتكەن الەمدىك جانە ءداستۇرلى دىندەر كوشباسشىلارىنىڭ VII سەزىنە بەلسەندى قاتىسقانى ءۇشىن كورولدىك وكىلدەرىنە العىسىن ءبىلدىردى.
«ەلدەر اراسىنداعى ىنتىماقتاستىق كەڭەيىپ، نىعايا تۇسەتىنىنە سەنىمدىمىن»، - دەدى ءاليحان سمايىلوۆ.
ءوز كەزەگىندە تاۋفيك بەن فاۋزان ءال-رابيا تۇراقتى اۋە رەيستەرىنىڭ اشىلۋى ەكىجاقتى قارىم-قاتىناستى نىعايتۋعا قوسىمشا سەرپىن بەرەتىنىن ايتتى.
«ساپار اياسىندا مەن قازاقستاندىق ارىپتەستەرىممەن ءبىرقاتار تابىستى كەزدەسۋلەر وتكىزدىم. تىكەلەي تۇراقتى رەيستەردىڭ اشىلۋى قازاقستاننان كەلەتىن تۋريستەر مەن قاجىلىققا بارۋشىلار سانىنىڭ وسۋىنە ىقپال ەتەدى دەپ ۇمىتتەنەمىز»، - دەدى تاۋفيك بەن فاۋزان ءال-رابيا.
