تۇركىستان - حالقىمىزدىڭ قايماعى بۇزىلماعان قاسيەتتى مەكەنى - پرەزيدەنت

تۇركىستان. قازاقپارات - جاقىندا استانادان باستاۋ العان «ۇلى دالا جورىعى» ساناۋلى كۇننەن سوڭ تۇركىستاندا ءوز مارەسىنە جەتەدى. مۇنىڭ زور سيمۆولدىق ءمانى بار. بۇل تۋرالى پرەزيدەنت تۇركىستان جۇرتشىلىعىمەن كەزدەسۋ بارىسىندا ايتتى، دەپ حابارلايدى قازاقپارات.

«وسى وڭىردە حالقىمىزدىڭ سالت- ءداستۇرى، ادەت- عۇرپى بارىنشا ساقتالعان. ءبىر سوزبەن ايتقاندا، تۇركىستان - حالقىمىزدىڭ قايماعى بۇزىلماعان قاسيەتتى مەكەنى. قازاق «قارياسى بار ەلدىڭ قازىناسى بار» دەيدى. تۇركىستاندا ۇرپاققا جول كورسەتىپ، تاعىلىمدى تاربيە بەرەتىن داناگوي اقساقالدارىمىز از ەمەس»، دەپ اتاپ ءوتتى قاسىم- جومارت توقايەۆ.

ول اقساقالداردىڭ ءتۇرلى جاعداي كەزىندە جۇرتتى سابىرعا شاقىراتىنىن، جاستارعا باسۋ ايتىپ، كيكىلجىڭگە جول بەرمەيتىنىن اتاپ ءوتتى. وسىنداي اۋزى دۋالى ەل اعالارىنا زور العىس ايتتى.

«مەنىڭ قاسيەتتى تۇركىستانعا ىقىلاسىم ەرەكشە ەكەنىن بىلەسىزدەر. مەملەكەت باسشىسى رەتىندە العاشقى ساپارىمدى ءدال وسى جەردەن باستاعان ەدىم. سودان بەرى مۇندا كوپتەگەن وڭ وزگەرىس بولدى.

سوڭعى جىلدارى تۇركىستانعا تارتىلعان ينۆەستيتسيا كولەمى 8 ەسە ارتتى. قالانىڭ ينفراقۇرىلىمى جاڭعىرىپ، جاڭا نىساندار بوي كوتەرىپ جاتىر. اتاپ ايتقاندا، 77 مىڭ ادامعا ارنالعان كوپ قاباتتى ۇيلەر سالىندى. شاھار جاسىل جەلەككە ورانىپ، ەكولوگيالىق احۋالى جاقساردى. تۇرعىنداردى اۋىزسۋمەن جانە تابيعي گازبەن قامتاماسىز ەتۋ ماسەلەسى شەشىلدى دەپ ايتۋعا بولادى»، - دەدى مەملەكەت باسشىسى.

پرەزيدەنتتىڭ ايتۋىنشا، تۇركىستان - ەلىمىزدەگى ەڭ باستى تۋريستىك ورتالىقتىڭ ءبىرى. وسى ايماققا كەلىپ جاتقان كوپتەگەن مەيماندار - سونىڭ ايقىن كورىنىسى. 2019 -جىلدان بەرى وبلىسقا 2 ميلليونعا جۋىق تۋريست كەلگەن.

ەلىمىزدەگى كوپبالالى انالاردىڭ ۇشتەن ءبىرى تۇركىستان وبلىسىندا تۇرادى.

«تۇركىستان وبلىسى - ەلىمىزدەگى حالىق ەڭ تىعىز قونىستانعان ايماق. مۇندا 2 ميلليوننان استام ادام تۇرادى. الەۋمەتتىك سالاداعى باستامالار ءار ازاماتتىڭ تۇرمىسىنا وزگەرىس اكەلەدى. وبلىستا اپاتتى جاعدايداعى جانە ءۇش اۋىسىممەن وقيتىن مەكتەپتەر ءالى دە بار. مەملەكەت بۇل ماسەلەنى شەشۋگە بارىنشا كۇش سالادى. سوڭعى جىلدارى 83 جاڭا مەكتەپ پايدالانۋعا بەرىلدى. قازىر 59 مەكتەپ سالىنىپ جاتىر. سەبەبى، ەلىمىزدىڭ ءاربىر 7- ءسابيى وسى وڭىردە دۇنيەگە كەلەدى. ولارعا ساپالى ءبىلىم وردالارىن سالىپ، جاعداي جاساۋ - ماڭىزدى مىندەتتىڭ ءبىرى»، - دەدى مەملەكەت باسشىسى.

ونىڭ ايتۋىنشا، وڭتۇستىكتەگى 6 اۋداندا 900 مىڭعا جۋىق ادام تۇرادى. دەموگرافيالىق ءوسىم بويىنشا سارى اعاش اۋدانى كوش باستاپ تۇر.

«سوندىقتان، وسى اۋداندا پەرزەنتحاناسى بار مەديتسينالىق كەشەن سالۋدى تاپسىرامىن. وعان قاجەتتى قارجىنى رەسپۋبليكالىق بيۋدجەتتەن ءبولۋ كەرەك. مۇنىڭ ءبارى تۇرعىنداردىڭ دەنساۋلىعىن جاقسارتۋعا سەپتىگىن تيگىزەرى ءسوزسىز. ەلىمىزدەگى كوپبالالى انالاردىڭ ۇشتەن ءبىرى تۇركىستان وبلىسىندا تۇراتىنى بەلگىلى. سوندىقتان، بۇل باستاما سىزدەر ءۇشىن دە وتە ماڭىزدى. ءبىز جاستارعا جان- جاقتى قولداۋ كورسەتەمىز. ولاردىڭ كاسىپكەرلىك باستامالارى ءۇشىن ءوسىمى 2,5 پايىز بولاتىن شاعىن نەسيە بەرىلەدى. جاستارىمىز وسىنداي مۇمكىندىكتەردى ۇتىمدى پايدالانىپ، ءوز كاسىبىن باستايدى دەپ سەنەمىن. ءبىر سوزبەن ايتقاندا، مەملەكەت زەينەتتەگى قاريالار مەن بەسىك تەربەتكەن انالارعا قولداۋ كورسەتە بەرەدى. ال، جالىندى جاستارعا ومىردە ءوزىنىڭ لايىقتى ورنىن تابۋعا جاعداي جاسايمىز»، - دەپ قورىتىندىلادى قاسىم- جومارت توقايەۆ.

رەداكتور

جانات قاپالبايەۆا