قاسىم-جومارت توقايەۆ تۇركىستان وبلىسى جۇرتشىلىعىمەن كەزدەستى
«تۇركىستان - اتاجۇرتىمىزدىڭ التىن قازىعى. تۇركىستان - ءبارىمىزدىڭ ماقتانىشىمىز، ەكى دۇنيە ەسىگى، ەر تۇرىكتىڭ بەسىگى اتانعان بۇكىل الەمگە تانىمال قاسيەتتى جەر. وسى كيەلى شاھاردىڭ ءتول تاريحىمىزدا ايرىقشا ورنى بار. تۇركىستان تورىندەگى قوجا احمەت ياساۋي كەسەنەسى - رۋحانياتىمىزدىڭ مىزعىماس دىڭگەگى»، - دەدى قازاقستان پرەزيدەنتى.
ونىڭ ايتۋىنشا، جاقىندا استانادان باستاۋ العان «ۇلى دالا جورىعى» ساناۋلى كۇننەن سوڭ تۇركىستاندا ءوز مارەسىنە جەتەدى.
«مۇنىڭ زور سيمۆولدىق ءمانى بار. وسى وڭىردە حالقىمىزدىڭ سالت- ءداستۇرى، ادەت- عۇرپى بارىنشا ساقتالعان. ءبىر سوزبەن ايتقاندا، تۇركىستان - حالقىمىزدىڭ قايماعى بۇزىلماعان قاسيەتتى مەكەنى. قازاق جىلناماسىنا التىن ارىپپەن جازىلعان كوپتەگەن تۇلعالارىمىز وسىندا جەرلەنگەن. بىلتىر قالاعا تۇركى الەمىنىڭ رۋحاني استاناسى دەگەن مارتەبە بەرىلدى. بۇل تۇركىستاندى تۇتاس تۇركى جۇرتى ەرەكشە قادىرلەيدى دەگەن ءسوز. ال، ءبىز كيەلى شاھاردى رۋحاني جانە تاريحي ەلوردامىز دەسەك، دۇرىس پايىم بولاتىنىنا كۇمانىم جوق. سوندىقتان، ۇكىمەت تاياۋ ارادا تۇركىستان قالاسىنا وسىنداي مارتەبە بەرۋ ماسەلەسىنە قاتىستى لايىقتى شەشىم قابىلدايدى دەپ ويلايمىن. قاستەرلى شاھار كونە زاماننان بەرى ۇلتتىڭ ۇياسى، قازاقتىڭ قارا شاڭىراعى بولىپ كەلەدى»، - دەپ اتاپ ءوتتى قاسىم-جومارت توقايەۆ.
