باس پروكۋراتۋرا جەكەلەگەن بلوگەرلەردىڭ جالعان اقپاراتتارىنا قاتىستى ۇندەۋ جاريالادى
ق ر باس پروكۋرورىنىڭ ورىنباسارى جاندوس ومىراليەۆ جەكەلەگەن بلوگەرلەردىڭ ارانداتۋشىلىق مالىمدەمەلەرىنە قاتىستى ۇندەۋ جاريالادى.
«وتاندىق اقپاراتتىق كەڭىستىكتە جانە ءارتۇرلى الەۋمەتتىك مەديادا ءتۇرلى تاقىرىپتار بويىنشا كورىنەۋ جالعان اقپارات تاراتۋ جاعدايلارى جيىلەپ كەتتى.
بۇل رەتتە ولار جەكەلەگەن بلوگەرلەردىڭ ارانداتۋشىلىق مالىمدەمەلەرىمەن جانە الەۋمەتتىك جەلى پايدالانۋشىلارىنىڭ ۇلتتىق الاۋىزدىقتى تۋدىراتىن بەلگىلەرى بار كوممەنتاريىمەن قوسا جۇرەدى.
جەكەلەگەن ازاماتتاردىڭ ار- نامىسى مەن قادىر- قاسيەتىنە نۇقسان كەلتىرەتىن، سونداي- اق ءبىرقاتار تانىمال تۇلعانى ۇستاۋ جانە قىلمىستىق جاۋاپتىلىققا تارتۋ تۋرالى جالعان حابارلامالار جاريالانۋدا.
مۇنداي فەيك مالىمەتتەر قوعامدا جالعان پىكىر قالىپتاستىرىپ قانا قويماي، سونىمەن بىرگە قوعامدىق تارتىپكە دە تەرىس اسەر ەتۋى ىقتيمال.
شىنايلىققا سايكەس كەلمەيتىن وسىنداي مالىمەتتەردى تاراتۋدى كوبىنە بلوگەرلەر قاساقانا، وزدەرىنىڭ جانە ءۇشىنشى تۇلعالاردىڭ مۇددەلەرى ءۇشىن جۇزەگە اسىرادى.
ولاردىڭ ماقساتى - جەكە پايدا تابۋ جانە بوپسالاۋ ارقىلى ماتەريالدىق تابىس كورۋ»، - دەلىنگەن ۇندەۋدە.
باس پروكۋراتۋرا ەسكەرتىپ وتكەندەي، ۇلتتىق الاۋىزدىقتى قوزدىرۋعا، بوپسالاۋشىلىققا، كورىنەۋ جالعان اقپارات تاراتۋعا باعىتتالعان ءىس- ارەكەتتەر ق ر قىلمىستىق كودەكسىنىڭ 174، 194 جانە 274-باپتارى بويىنشا جاۋاپتىلىققا اكەپ سوعادى.
«وسىعان بايلانىستى، ق ر باس پروكۋراتۋراسى ەل ازاماتتارىن، بۇقارالىق اقپارات قۇرالدارىنىڭ وكىلدەرىن، الەۋمەتتىك جەلىلەردىڭ پايدالانۋشىلارىن زاڭنامانى بۇلجىتپاي ساقتاۋعا جانە جوعارىدا كەلتىرىلگەن كەز كەلگەن قۇقىق بۇزۋشىلىقتاردىڭ جاسالۋىنا جول بەرمەۋگە، ارانداتۋشىلىققا بوي بەرمەۋگە جانە تەك رەسمي اقپارات كوزدەرىنە عانا سەنۋگە شاقىرادى»، - دەدى پروكۋراتۋرادان.
