پرەزيدەنت سايلاۋى: كانديداتتارعا قول قويۋ پاراعىن بەرۋ مەرزىمى قىسقارتىلدى
«ءبىز سايلاۋ تۋرالى كونستيتۋتسيالىق زاڭنىڭ بىزگە بەرەتىن قۇقىعىن پايدالانۋ جونىندە شەشىم قابىلدادىق. وندا پرەزيدەنتتىڭ كەزەكتەن تىس سايلاۋى وسى زاڭدا كەزەكتى پرەزيدەنت سايلاۋى ءۇشىن بەلگىلەنگەن قاعيدالارعا سايكەس وتكىزىلەدى دەلىنگەن. سايلاۋدى وتكىزۋ مەرزىمىن ورتالىق سايلاۋ كوميسسياسى ايقىندايدى»، - دەدى ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ.
و س ك ءتوراعاسىنىڭ ايتۋىنشا، وڭىرلىك سايلاۋ كوميسسيالارى اتالعان جاڭاشىلدىقپەن جۇمىس ىستەۋى ءتيىس.
«سايلاۋ زاڭناماسى نەگىزىندە پرەزيدەنتتىككە كانديداتتارعا قول قويۋ پاراعىن بەرۋ مەرزىمىن ەكى ەسە قىسقارتتىق. ياعني 5 كۇننەن 2 كۇنگە دەيىن. سونىمەن قاتار ۇمىتكەرلەر جيناعان قولدىڭ دۇرىستىعىن تەكسەرۋ مەرزىمى 10-نان 5 كۇنتىزبەلىك كۇنگە دەيىن قىسقارتىلدى. وسىلايشا مەرزىمدەردى قىسقارتۋ ەسەبىنەن كانديداتتارعا قول جيناۋعا كوبىرەك ۋاقىت بەرىلدى»، - دەيدى ول.
