ديماش قۇدايبەرگەن الماتىداعى كونسەرتىنەن كەيىن فاناتتارىمەن كەزدەستى - فوتو
كەزدەسۋگە الەمنىڭ ءتۇرلى ەلىنەن ءانشى ونەرىنە ءتانتى جانكۇيەرلەرى كوپ جينالدى. مۇنداعى كوڭىل كۇي كەرەمەت بولدى. تىڭدارمانعا ديماش پەن ونىڭ دوستارى وسى كەزدەسۋ ءۇشىن ارنايى دايىنداعان قىزىقتى باعدارلاما ۇسىنىلدى. ءان دە ايتىلدى، ەرەكشە سىيلىقتار ۇتىسى دا بولدى.
كەش جۇرگىزۋشىلەرى - تانىمال شوۋمەندەر مارات ورالعازين مەن ەركەبۇلان مىرزابەك كەزدەسۋدى سۇحبات تۇرىندە وتكىزدى. ءانشى الماتىداعى العاشقى كونسەرتىنەن جانە ريم پاپاسىمەن كەزدەسۋدەن العان اسەرىمەن ءبولىستى. ءار جىلدارى ساحنادا ۇشىراعان قىزىقتى وقيعالارىن ايتىپ، سىرىن دا جاسىرمادى.
«كەشەگى كونسەرتىمنىڭ ءار سەكۋندى ەسىمدە. بۇل وتە كەرەمەت كەش بولدى. جانكۇيەرلەرىمنىڭ قولداۋىن قاتتى سەزىندىم»، - دەدى ديماش.
وسى كەزدەسۋگە بولگاريادان ارنايى كەلگەن اندجەلا ەسىمدى التى جاسار بالاقايدىڭ ساحناداعى قىلىعى كوپشىلىكتى ءسۇيسىنتتى. كىشكەنتاي تىڭدارمان سۇيىكتى ءانشىسىن قاتتى قۇشاقتاپ، ۇزاق ۋاقىت جىبەرمەدى.
جينالعانداردىڭ دەنى ديماشتان ءان ايتىپ بەرۋدى، كەيبىرى ءتىپتى ءانۇراندى ورىنداۋىن سۇرادى. اقساقالداردىڭ ءبىرى ءانشىنىڭ شىعارماشىلىعىنا ريزاشىلىعىن ءبىلدىرىپ، ونىڭ نەگە كۇزەتسىز جۇرەتىنىن سۇرادى. ديماش ءوزىن قاۋىپسىز سەزىنەتىنىن، سوندىقتان كۇزەتتىڭ قاجەتتىلىگى جوق دەپ سانايتىنىن جەتكىزدى. الايدا، وزگە ەلدەرگە بارعاندا سەكيۋريتي قىزمەتىن پايدالاناتىنىن ايتتى.
فاناتتاردىڭ ءبىرى جەكە ءومىرى تۋرالى سۇراعان ەدى، ءبىراق ءانشى بۇل ساۋالدى جاۋاپسىز قالدىردى. جۇرگىزۋشىلەر ساحناعا ءانشىنىڭ اتا-اناسىن شاقىردى. ولار ديماش تۋعان كۇندى ەسكە الىپ، ونىڭ بالالىق شاعى مەن قىزىعۋشىلىقتارى تۋرالى اڭگىمەلەدى. اكەسىنىڭ ايتۋىنشا، «ديماش شىعارماشىلىق جولىن تاڭداماعاندا، كاسىبي فۋتبولشى بولۋى مۇمكىن ەدى».
ءانشىنىڭ جانكۇيەرلەرى ونىمەن سۋرەتكە ءتۇسىپ، اۆتوگراف الدى. سونداي-اق، سىيلىق بەرگەن قىزدار دا بولدى.
كەزدەسۋ سوڭىندا ديماش اتا- اناسىنا، تۋعاندارىنا قولداۋلارى ءۇشىن، فاناتتارىنا جاڭا جەتىستىكتەرگە شابىتتاندىراتىندارى ءۇشىن العىس ءبىلدىردى. دوستارى، ارىپتەستەرى مەن كومانداسىنا راحمەت ايتتى. قازاقستاندىقتاردى تۋعان ءتىلى مەن جەرىن سۇيۋگە، قۇرمەتتەۋگە شاقىردى. بارشا جينالعاندارعا دەنساۋلىق، بەيبىتشىلىك پەن جاقسىلىق تىلەدى.
سونداي-اق، كەزدەسۋ بارىسىندا «ءبىر اسپان تاريحى» كومپوزيتسياسىنا تۇسىرىلگەن الەمدەگى ەڭ قىمبات بەينەبايان كورسەتىلدى. تۋىندى تۇسىرىلىمىنە 300 ادام قىزمەت ەتكەن. 12 مينۋتتىق ەڭبەك جەر شارىنداعى ادامداردىڭ بىرلىگىن دارىپتەيدى. بۇل جوبا بويىنشا جۇمىستى ديماش قۇدايبەرگەننىڭ ءوزى ءۇش جىل بۇرىن باستاعان.
بۇعان دەيىن حابارلاعانىمىزداي، 23-قىركۇيەك كۇنى الماتىدا ديماش قۇدايبەرگەننىڭ «Stranger» اتتى جەكە كونسەرتى انشلاگپەن ءوتتى . بۇل - ديماشتىڭ الماتىدا وتكىزگەن العاشقى كونسەرتى.
ديماش قۇدايبەرگەنىڭ شەتەلدىك تىڭدارماندارى ءانشىنىڭ كونسەرتىنە ارنايى ۇشىپ كەلدى. ولاردىڭ كوپشىلىگى قازاقستان تۋرالى اسەرلەرىمەن ءبولىستى.
«قازاقستانعا العاش رەت كەلىپ وتىرمىز. العان اسەرىمىز كەرەمەت. مۇنداعى تابيعات وتە ادەمى، تاماعى ءدامدى، ونىڭ ۇستىنە جىلقى ەتىن جەپ كوردىك. ءبىز الماتىدا كوك بازار، كوكتوبە مەن كولسايعا باردىق، ەندى مەدەۋگە بارماقشىمىز»، - دەدى سلوۆاكيادان كەلگەن قوناقتار ياروسلاۆا مەن يننا.
