ماسكەۋلىك جىگىت موبيليزاتسيادان قالاي قاشقانىن ايتىپ بەردى

استانا. قازاقپارات – موبيليزاتسياعا جارايمىن با، جوق پا بىلمەيمىن، ءبىراق ءومىرىمدى تاجىريبەگە اينالدىرعىم كەلمەيدى.

موبيليزاتسيادان قاشقان رەسەيلىك ازامات ВВС - گە قازاقستان شەكاراسىن قالاي كەسىپ وتكەنىن ايتىپ بەردى، دەپ حابارلايدى Ulysmedia.kz.

اندرەي س. اتتى ازامات قىركۇيەكتىڭ 21-نەن 22-سىنە قاراعان ءتۇنى رەسەي- قازاقستان شەكاراسىنان قالاي وتكەنىن ايتىپ بەردى.

«21- قىركۇيەكتە تاڭعى ساعات 9-دا تۇرىپ، پرەزيدەنتتىڭ ۇندەۋىن تىڭدادىم. ساعات 10.30-دا اپىل- عۇپىل كەرەك- جاراعىمدى جيناۋ ءۇشىن ەكىنشى پاتەرگە باردىم. 14.00-دە چەليابىگە ۇشىپ، سول جەردەن شەكاراعا جەتتىم. موبيليزاتسياعا جارايمىن با، جوق پا بىلمەيمىن، ءبىراق ءومىرىمدى تاجىريبەگە اينالدىرعىم كەلمەيدى»، - دەيدى رەسەيلىك.

ونىڭ ايتۋىنشا، شەكارادا ۇلكەن كەزەك قالىپتاسقان. كوبىنەسە ەر ادامدار شەكارادان وتۋگە اسىق، كەيبىرى قىزدارمەن جانە ايەلدەرىمەن ءوتىپ كەتىپ جاتقان كورىنەدى. ءبىراق كەزەكتە تۇرعانداردىڭ 90 پايىزى جاس جىگىتتەر.

«كەزەك كۇتىپ بىرنەشە ساعات تۇرعان كەزدە وسى ۋاقىت ارالىعىندا بىرنەشە بۇيرىق شىعىپ كەتۋى مۇمكىن ەكەنىن تۇسىندىك. ءسويتىپ، چەموداندارىمىزدى الىپ، جاياۋ شەكارادان وتۋگە كەتتىك. رەسەي شەكاراسىنان وتۋگە ءبىر جارىم ساعات كەتەدى. شەكاراشىلار بيلەتتى قاشان العانىن، قانداي اسكەري ماماندىقتا ەكەنىمىزدى، جۇمىلدىرۋ تۋرالى ەستىدىڭ بە دەپ سۇرايدى ەكەن. بارلىعىن 7-10 مينۋتتاي ۇستاپ، كەيبىر جىگىتتەردى قوسىمشا جاۋاپ الۋعا اكەتەدى، ءبىراق ەشكىمنەن اسكەري بيلەت سۇرامايدى»، - دەيدى جاس جىگىت.

اندرەي رەسەيگە ورالعىسى كەلمەيتىنىن اتاپ ءوتتى.

«تۇندە چەمودانىڭدى ۇستاپ كەلە جاتىپ، تەاتر قويىلىمىندا جۇرگەندەي ەلەستەتەسىڭ ءوزىڭدى. قازاق شەكاراشىلارى بوسقىن بولىپ قايدا قاشىپ جۇرسىڭدەر دەپ كۇلەدى. رەسەيگە قايتپايمىن. ناۋرىزدىڭ باسىندا قازاقستانعا التى ايعا كەتتىم، سودان كەيىن ماسكەۋگە اتا- اناما ءبىر ايعا بارامىن دەپ شەشكەم، ايالداي المادىم - تاعى دا قاشۋعا تۋرا كەلدى»، - دەيدى ول.

ەسكە سالايىق، 21 - قىركۇيەكتە رەسەي پرەزيدەنتى ۆلاديمير پۋتين ەلدە ءىشىنارا جۇمىلدىرۋ تۋرالى حابارلاعان بولاتىن. وسىدان كەيىن رەسەي فەدەراتسياسىنان باسقا ەلدەرگە الداعى بىرنەشە كۇندىك بيلەتتەردىڭ بارلىعى دەرلىك بىرنەشە ساعاتتا ساتىلىپ كەتتى. بۇكىل رەسەيدە موبيليزاتسياعا قارسى ميتينگىلەر ءوتتى.

ال رەسەي بيلىگى 300 مىڭ ادامدى اسكەري قىزمەتكە شاقىرۋدى كوزدەپ وتىر.