قىزىرحان باباقۇمار ۇلىنا «حالىق كۇيشىسى» اتاعى بەرىلدى

استانا. قازاقپارات - «قازاقستان اۆتورلار قوعامىنىڭ» مۇشەسى، «قازاقستان رەسپۋبليكاسى كۇيشىلەر وداعىنىڭ» مۇشەسى، قازاق مادەنيەتىنىڭ قايراتكەرى، بەلگىلى كۇيشى قىزىرحان باباقۇمار ۇلىنا «حالىق كۇيشىسى» اتاعى بەرىلدى، دەپ حابارلايدى قازاقپارات.

ايتا كەتەيىك، الماتى وبلىسى جامبىل اۋداندىق مادەنيەت ۇيىندە قىزىرحان باباقۇمار ۇلىنىڭ «التايدان الاتاۋعا كۇي بولىپ توگىلدىم!» اتتى كۇي كەشى وتكەن ەدى. وسى كەشتە ق ر كۇيشىلەر وداعى الماتى فيليالىنىڭ ءتوراعاسى تالاپ قاراش قىزىرحان باباقۇمار ۇلىنا «حالىق كۇيشىسى» توسبەلگىسىن تابىستادى.

مادەني شاراعا «ۇكىلى دومبىرا» سايىسىنىڭ باس جۇلدەگەرى، «التىن دومبىرا» سىيلىعىنىڭ يەگەرى جولاۋشى تۇردىعۇلوۆ، ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ دوتسەنتى مۇرات ءابۋعازى، قۇرمانعازى اتىنداعى قازاق ۇلتتىق كونسەرۆاتورياسىنىڭ دوتسەنتى قۋانىش جۇماعالي قاتارلى ونەر يەلەرى قاتىستى.

سونىمەن قاتار، سالتاناتتى كەشتە قىزىرحان باباقۇمار ۇلىنىڭ «ءسۇيىنشى» اتتى كىتابىنىڭ تۇساۋى كەسىلىپ، كوپشىلىككە تاراتىلدى. دۋماندى كەش اۆتوردىڭ جەكە كۇيلەرىن ورىنداۋمەن جالعاستى.

ايتا كەتەيىك، قىزىرحان باباقۇمار ۇلى 1959 -جىلى قاراشادا قىتايدىڭ التاي ايماعىندا دۇنيەگە كەلگەن. ەڭبەك جولىن جەمەنەي اۋداندىق № 2 - مەكتەبىندە ۇستازدىقتان باستاعان. قازىر الماتى وبلىسى جامبىل اۋدانىندا تۇرادى. ول - «كۇي- كەرۋەن» دەگەن اتپەن 60-تان استام كۇيلەر توپتاستىرىلعان ەكى جيناقتىڭ اۆتورى. ءوزىنىڭ جيىرمادان استام اۆتورلىق كۇيلەرى مەن اندەرى بار. ق ر ۇلتتىق مۋزەيدىڭ ونەر مۇراعاتىنا 60 قا جۋىق، «دومبىرا» ۇلتتىق تەلەارناسىنا 15 جانە «شالقار» راديوسىنىڭ التىن قورىنا 40 تان استام كۇيدى ەنگىزىپ، قازاق حالقىنىڭ رۋحاني قازىناسىنا ءوز ۇلەسىن قوسقان.

اۆتور بەيسەن سۇلتان ۇلى