سەناتور نەگىزگى ازىق-تۇلىك باعاسىن ۇستاپ تۇرۋعا قاتىستى ۇسىنىس ايتتى
بۇل تۋرالى سەناتتىڭ جالپى وتىرىسىندا دەپۋتات اندرەي لۋكين ايتتى، دەپ حابارلايدى قازاقپارات ءتىلشىسى.
دەپۋتات بۇل جاعداي جاۋاپتى ۆەدومستۆولار جانە اكىمدىكتەر ءتيىستى زاڭنامالىق رەتتەۋ مەن الەۋمەتتىك ماڭىزى بار ازىق-تۇلىك تاۋارلارىنىڭ ساۋداسىنا ءادىسنامالىق اسەر ەتۋدى قامتاماسىز ەتپەيتىندىگىنە بايلانىستى تۋىنداپ وتىر دەپ سانايدى.
«ساۋدا قىزمەتىن رەتتەۋ تۋرالى» زاڭداعى 9-باپتىڭ الەۋمەتتىك ماڭىزى بار ازىق-تۇلىك تاۋارلارىنا ۇستەمە اقىلاردىڭ %15 دان اسىپ كەتۋىنە جول بەرمەۋ تۋرالى تالاپتارى دەكلاراتيۆتى سيپاتتا بولادى، ونى ءىس جۇزىندە ەشكىم ساقتامايدى. بيۋجەت قاراجاتىن ءتيىمسىز پايدالانۋ جانە ۇرلاۋ، الەۋمەتتىك ماڭىزى بار ازىق-تۇلىك تاۋارلارىنىڭ كولەمىن تيىسىنشە ساقتاماۋ، ءبولۋ جانە جوسپارلاۋ فاكتىلەرى، سونداي-اق اكىمدىكتەر جۇمىسىنداعى كەمشىلىكتەر تۇراقتى زاڭ بۇزۋشىلىعىنا اينالدى»، - دەدى دەپۋتات پرەمەر-مينيستر ءاليحان سمايىلوۆتىڭ اتىنا جولداعان ساۋالىندا.
اندرەي لۋكين بىردە-ءبىر ۋاكىلەتتى ورگان وسى سالاداعى زاڭنامانى رەتكە كەلتىرۋ ماسەلەسىن قولعا الماي وتىرعانىن اتاپ ءوتتى. سەناتور وسىعان بايلانىستى ازىق-تۇلىك قاۋىپسىزدىگى سالاسىنداعى جاعدايدى جاقسارتۋ تەتىكتەرىن ۇسىندى.
«كولىك شىعىستارىن سۋبسيديالاي وتىرىپ، الەۋمەتتىك ماڭىزى بار ازىق-تۇلىك تاۋارلارىن تۇراقتاندىرۋ قورلارىنا ءبىرىڭعاي جەتكىزۋ ءۇشىن ءىرى وتاندىق تاۋار وندىرۋشىلەرىنە ۇزاق مەرزىمدى مەملەكەتتىك تاپسىرىستار قالىپتاستىرۋ قاجەت. الەۋمەتتىك ماڭىزى بار ازىق-تۇلىك تاۋارلارىنىڭ تومەندەتىلمەيتىن قورىن مەملەكەتتىك ماتەريالدىق رەزەرۆكە ۇقساس بەلگىلەۋ كەرەك. الەۋمەتتىك ماڭىزى بار ازىق-تۇلىك تاۋارلارىنىڭ ىشكى نارىعىن كەز كەلگەن جاعىمسىز قۇبىلىستاردان قورعاۋ تەتىكتەرىن ازىرلەۋدى قولعا الۋ كەرەك»، - دەدى اندرەي لۋكين.
