باۋىرجان مومىش ۇلى: ۇلىما ايتارىم

استانا. قازاقپارات - «ءبىر اكەنىڭ تاربيەسىن ءجۇز مەكتەپ تە بەرە المايتىنى» اقيقات. اكەنىڭ ورنى بالا ءۇشىن قاشان دا ەرەك. بالانىڭ بويىنداعى ادامگەرشىلىك، كىشىپەيىلدىلىك، ادالدىق، قامقورلىق، ت. ب. سىندى قاسيەتتەر اكە ءتالىمى ارقىلى قالىپتاسادى.

قازاقتىڭ باتىرى، ۇلت ماقتانىشى باۋىرجان مومىش ۇلىنىڭ ۇلىنا ايتقان اقىل- كەڭەستەرى قاي اكەگە دە ۇلگى. ەگەر ۇلىڭىز بولسا، باتىردىڭ تاعىلىمعا تولى كەڭەسىن ءسىز دە ايتىپ، كىشكەنە كۇنىنەن قۇلاعىنا قۇيساڭىز ارتىق ەتپەيدى.

1. ەردىڭ ەكى سويلەگەنى - ولگەنى. ۋادە بەرمەۋگە تىرىس. ايتپەسە، سوزىڭدە تۇر.

2. قىسقا، نۇسقا سويلە. داۋىسىڭ انىق بولسىن.

3. كوپ تىڭدا. از سويلە. ءسوزىڭنىڭ ارتىنان ىسىڭمەن ۇلگەرۋگە جانىڭدى سال.

4. وسەك ايتىلاتىن جەردە بولما. كەزدەيسوق بولعان جاعدايدا قوسىلما. كەسىپ تاستاۋعا تىرىس.

5. تاسپەن اتقاندى اسپەن ات - جەڭەسىڭ! سودان كەيىن الشاق ءجۇر.

6. رەنجىتپە! جۇيەلى قارعىس يەسىن تابادى.

7. ەشقاشان ماقتانبا! جۇرت ماقتاسىن.

8. ءوزىڭدى سىيلا. وزگەلەر سىيلاسىن.

9. كۇندە وزىڭە ەسەپ بەر. ءوزىڭدى تاربيەلەي بەر.

10. قۇمار ويىن - ءالسىزدىڭ الەگى. مىقتىنىڭ رۋحى بيىك، دەنەسى شىمىر.

11. ۇيرەتەرى مول مىقتىلاردان ۇستازدارىڭ بولسىن. ءبىراق، ەشكىمدى ءپىر تۇتپا.

12. سىيلاعاننىڭ قۇلى بول. كىشىرەيۋ تومەندەۋ ەمەس.

13. ەڭ الدىمەن وزىڭە ءوزىڭنىڭ كوڭىلىڭ تولاتىنداي ءومىر ءسۇر.

14. ساياحاتتا. دۇنيەتانىمىڭنىڭ اياسى كەڭەيەدى.

15. قايتارىمىنان ءۇمىتتى بولساڭ، جاقسىلىق جاساما.

16. جۇيكەڭ ءالى تالاي قاجەت بولادى. بولماشىعا توزدىرما. شەشۋشى ساتتەرگە باپتا.

17. بويجەتكەننىڭ كوڭىلىن وڭاي جاۋلاعاپ، ونىمەن بولعانىڭا شاتتانىپ، ءسوز قىلما. ەرلىك ەمەس!

18. ۋايىمعا سالىنۋدان الشاق بول. اربا دا سىنبايتىن، وگىز دە ولمەيتىن شەشىم قابىلدا. تەز شەشىم قابىلدا. تاۋەكەل ءتۇبى جەل قايىق جۇزەسىڭ دە وتەسىڭ. ۋايىم ءتۇبى تۇڭعيىق باتاسىڭ دا كەتەسىڭ.

19. ۋازىرى مىقتىنىڭ تىرلىگى جەڭىل. مىقتىسىن تاڭدا!

20. سىرىڭدى ەشكىمگە الدىرتپا! ەكى ەلى اۋىزىڭا سىيماعان ءسوز وزگەنىڭ وتىز ەكى ءتىسىنىڭ اراسىنا تىپتەن سىيمايدى.

21. مۇمكىن ناتيجەلەرىن ەلەستەتىپ كور. ناتيجەسى ۇناماسا، كەلىسپە.

22. وكپەلەمە. ءوش الما. ساناسىنا بەر. اللاعا تاپسىر!

23. قىران قۇستاي قىراعى بول. وزگەلەردى وزىڭدەي كورمە.

24. پەندەنىڭ پەندەدەن ايىرماشىلىعى ادامگەرشىلىگى مەن بىلىمىندە. تانى، وقى!

25. ونەر ۇيرەن. ماماندىعىڭدا مىقتىسى بول.

26. جەر قوزعالماسا قوزعالمايتىن سابىرلى ءزىل بول.

27. ءومىرىڭنىڭ ساپاسىنا تەك سەن جاۋاپتىسىڭ

28. جالعىز اپاڭا (اپكەڭە) قورعان بول. تۇرمىستا بولسا دا، ءوز كۇيەۋى - قورعانى بار دەمە. سەنىڭ ورنىڭ تىم بولەك.

29. ۇيلەنۋگە اسىقپا. جار تاڭداۋدان جاڭىلما.

30. ۇرپاق تاربيەسى ەلۋ پايىز سەنىڭ مويىنىڭدا. ۇلىڭ وزىڭنەن وزاتىن بولسىن! قىزىڭ ساعان قاراپ سەرىگىن تاۋىپ باقىتتى بولسىن.

31. ەردىڭ از مىندەتتەرىنىڭ ءبىرى وتباسىن اسىراۋ. ساعان سەنگەندەرگە ەشنارسەدەن تارشىلىق كورسەتپە.

32. بارلىق جاقسى قاسيەتتىڭ دىڭگەگى ادەپتىلىك. بارلىق جاقسىنى ادەپتىڭ ۇستىنە ورنات.

33. كىم قانشا تومەن تۇسسە دە، سەن ءوزى بيىگىڭدە قال.

Massaget.kz