قازاقستاننىڭ ەڭ شۇرايلى جەرلەرى يگەرۋسىز جاتىر - دەپۋتات ەرلان سايروۆ

استانا. قازاقپارات - حالىق اۋىل شارۋاشىلىعىمەن اينالىسۋعا نيەتتى. ءبىراق بيلىككە جاقىن ازاماتتار قازاقستاننىڭ ەڭ شۇرايلى جەرلەرىن وزدەرىنە الىپ العان. كوبى يگەرۋسىز جاتىر.

Jibek Joly تەلەارناسىنا سۇحبات بەرگەن ق ر پارلامەنتى ءماجىلىسىنىڭ دەپۋتاتى ەرلان سايروۆ وسىلاي مالىمدەدى، دەپ حابارلايدى قازاقپارات ءتىلشىسى.

«مالدىڭ سانى ارتىپ كەلە جاتىر. ازاماتتار اۋىل شارۋاشىلىعىمەن اينالىسقىسى كەلەدى. ءبىراق ەشقانداي جاعداي جوق. ياعني، جايلىمدىق جەر جوق. وسى جىلدىڭ ىشىندە اتقامىنەرلەر جانە بيلىككە جاقىن ازاماتتاردىڭ بارلىعى قازاقستاننىڭ ەڭ شۇرايلى جەرلەرىن وزدەرىنە الىپ العان. وكىنىشتىسى، ول جەردى نە وزدەرى يگەرمەيدى نە حالىققا بەرمەيدى. وسى ماسەلەنى شەشۋ ءۇشىن پرەزيدەنتتىڭ ءوزى بۇل ماسەلەگە ەكى رەت نازار اۋداردى. سونىمەن قاتار، «جەر اماناتى» اتتى ارنايى كوميسسيا قۇرىلدى. جەردى قايتارۋدىڭ نەگىزگى پرينتسيپى بار. ەگەر جەردى يگەرمەي جاتقانى جونىندە دالەلدەر بولسا، وندا سوت ارقىلى قايتارۋعا بولادى. ەكىنشىسى - جەر يەلەرىمەن سويلەسۋ ارقىلى ولار ءوز ەركىمەن قايتارىپ بەرۋى ىقتيمال»، - دەدى دەپۋتات.

ەرلان سايروۆتىڭ ايتۋىنشا، «جەر اماناتى» كوميسسياسىنىڭ جۇمىسى ناتيجەسىندە بۇگىندە 3,5 ميلليون گەكتار جەر مەملەكەت مەنشىگىنە قايتارىلعان. جىل سوڭىنا دەيىن تاعى 1,5 ميلليون گەكتاردى قايتارۋ جوسپارلانعان.

«بۇل ۋاقىتقا دەيىن ورتا جانە كىشى بيزنەسكە موراتوري بولعان. موراتوريدىڭ اياسىندا جەرگە قاتىستى تەكسەرۋلەر بولامادى. پرەزيدەنت جاقىندا بۇل موراتوريدى الىپ تاستادى. ياعني، ەندى جەر تەلىمدەرىنە قاتىستى ورتا جانە كىشى بيزنەسكە تەكسەرىس جۇرگىزۋگە بولادى. وسىنىڭ ناتيجەسىندە ءبىز ءبىراز جۇمىستار اتقارامىز»، - دەپ جۇمىستاردىڭ قورىتىندىسىنا توقتالدى ءماجىلىس دەپۋتاتى.

اۆتور

ءاليحان اسقار