ۋكراينانىڭ بىرنەشە ايماعى رەسەي قۇرامىنا كىرۋ تۋرالى رەفەرەندۋم وتكىزۋگە دايىندالىپ جاتىر
ءوزىن- ءوزى جاريالاعان دونەتسك حالىق رەسپۋبليكاسى، لۋگانسك حالىق رەسپۋبليكاسى، حەرسون وبلىسى مەن زاپوروج وبلىسىنىڭ بيلىگى داۋىس بەرۋ 23-27 - قىركۇيەك ارالىعىندا وتەتىنىن جاريا ەتتى. باسشىلىق بۇل تۇرعىندار مەن قوعامدىق ۇيىمدار تاراپىنان ساۋالدار تۇسكەننەن كەيىن قابىلدانعان شەشىم ەكەنىن مالىمدەدى. داۋىس بەرۋ ەلەكتروندى تۇردە وتپەيتىنى بىردەن ايتىلدى. ويتكەنى ونداي مۇمكىندىك جوق. رەفەرەندۋمگە كەدەرگى ەتكەندەر زاڭ الدىندا جاۋاپ بەرەدى.
دەنيس پۋشيلين، د ح ر باسشىسى:
- بىزگە قوعامدىق پالاتالاردان ساۋال ءتۇستى. مەندە مىناداي ۇسىنىس بار. باسقا وڭىرلەردىڭ اكىمشىلىك باسشىلارىمەن كۇش بىرىكتىرگەن دۇرىس دەپ سانايمىن. سوندا رەفەرەندۋمگە دايىندىق جۇرگىزۋدڭ الگوريتمىن ازىرلەي الامىز.
ۆلاديمير وۆچارەنكو، حەرسون وبلىسى قوعامدىق كەڭەسىنىڭ ءتوراعاسى:
- كوپ ساۋال ءتۇستى. سوندىقتان ءبىز حەرسون وبلىسىنىڭ رەسەي فەدەراتسياسىنىڭ قۇرامىنا كىرۋى تۋرالى رەفەرەندۋم وتكىزەتىن ۋاقىت كەلدى دەپ شەشتىك. ءبىز بەيبىت ءومىر سۇرگىمىز كەلەدى. كيەۆ رەجيمىنىڭ كەسىرىنەن ونەركاسىپ، اۋىل شارۋاشىلىعى، دەنساۋلىق ساقتاۋ، ءبىلىم بەرۋ سالاسىنىڭ بىت- شىتى شىقتى.
ۋكرايناداعى رەفەرەندۋمگە قاتىستى كرەمل تۇسىنىكتەمە بەردى. رەسەي قاۋىپسىزدىك كەڭەسى ءتوراعاسىنىڭ ورىنباسارى دميتري مەدۆەديەۆتىڭ ايتۋىنشا، ساياسي شارا رەسەيدىڭ دامۋ ۆەكتورىن تۇبەگەيلى وزگەرتەدى. ال مەملەكەتتىك دۋما دەپۋتاتتارى بۇگىن «موبيليزاتسيا»، «اسكەري جاعداي»، «اسكەري ۋاقىت» تۇسىنىكتەرىن ەنگىزۋ تۋرالى زاڭ جوباسىن ماقۇلدادى. سونداي- اق اسكەري قىزمەتتەن قاشقان ءۇشىن جازا 10 جىلعا دەيىن ارتتى. ايتا كەتەرلىگى، سوڭعى جاڭالىقتارعا بايلانىستى ماسكەۋ بيرجاسىندا اكسيالار 10 پروتسەنتكە دەيىن قۇلدىراعان.
www.24.kz
