قاسىم- جومارت توقايەۆ حالىقارالىق تۇراقتىلىقتىڭ ءۇش قاعيداتىن اتادى
«وسىدان 77 جىل بۇرىن ب ۇ ۇ- نىڭ نەگىزىن قالاۋشى مەملەكەتتەر ۇيىمنىڭ جارعىسىنا حالىقارالىق قۇقىقتىڭ قاعيداتتارى مەن نورمالارىن ەنگىزدى. بۇل ەرەجەلەر وسى ۋاقىت ارالىعىندا ءبىزدىڭ قىزمەتىمىزدى ءتيىمدى رەتتەپ كەلدى. قازىر وسى امبەباپ ۇيىمنىڭ نەگىزىندە قالىپتاسقان ىرگەلى قاعيداتتارعا قايتا ورالۋ اسا ماڭىزدى»، - دەدى مەملەكەت باسشىسى.
قازاقستان پرەزيدەنتى مەملەكەتتەردىڭ ەگەمەندىگى ونىڭ اۋماقتىق تۇتاستىعىمەن تىعىز بايلانىستى ەكەنىن ەسكە سالدى.
«اتاپ ايتقاندا، ءبىز مەملەكەتتەر ەگەمەندىگىنىڭ تەڭدىگى، مەملەكەتتەردىڭ تەرريتوريالىق تۇتاستىعى، مەملەكەتتەردىڭ بەيبىت قاتار ءومىر ءسۇرۋى سەكىلدى باستاپقى ءۇش قاعيدات اراسىنداعى بايلانىستى قايتا زەردەلەۋىمىز قاجەت. بۇل ءۇش قاعيدات ءوزارا ءبىر- بىرىنە تاۋەلدى. وسى قاعيداتتاردىڭ ءبىرىن ساقتاۋ قالعان ەكەۋىن ۇستانۋدى بىلدىرەدى. ال ولاردىڭ ءبىرىن بۇزۋ، باسقا ەكەۋىن بۇزعان بولىپ سانالادى»، - دەدى پرەزيدەنت.
«ءبىز مۇندا – ب ۇ ۇ شتاب- پاتەرىندە ادامزات ءۇشىن اسا ماڭىزدى كەزەڭدە باس قوسىپ وتىرمىز. الەم گەوساياسي قايشىلىقتار كۇشەيىپ كەلە جاتقان جاڭا كەزەڭگە قادام باسقان سەكىلدى» - دەدى مەملەكەت باسشىسى.
ول قازىرگى جۇيە الەمدە تۇراقتىلىقتى ساقتاۋعا قاۋقارسىز بولىپ تۇرعانىن اتاپ ءوتى.
«ءتارتىپ پەن جاۋاپكەرشىلىككە نەگىزدەلگەن ءارى بۇرىن قالىپتاسقان حالىقارالىق جۇيەنىڭ ورنىن حاوس پەن بولجاۋعا كەلمەيتىن جاعداي باسىپ وتىر. تەجەمەلىك جانە تەپە- تەڭدىكتىڭ جاھاندىق جۇيەسى بەيبىتشىلىك پەن تۇراقتىلىقتى ساقتاپ قالا المادى. قاۋىپسىزدىك ارحيتەكتۋراسى كەلمەسكە كەتىپ بارادى. الەمدىك الپاۋىتتار اراسىنداعى ءوزارا سەنىمسىزدىك جىلدام ارتا ءتۇستى. الەم جاڭا اسكەري قاقتىعىس وشاقتارىنىڭ قۇربانىنا اينالدى»، - دەدى پرەزيدەنت.
اۆتور
ەسىمجان ناقتىباي
