قازاقستان ءانۇرانىن ورىنداعان ديماش قۇدايبەرگەن شەتەلدىكتەردى ءتانتى ەتتى

استانا. قازاقپارات - شەتەلدىك ب ا ق پەن شەتەلدىك كورەرمەن گەننادي گولوۆكين مەن مەكسيكالىق ساۋل كانەلو الۆارەس جەكپە-جەگىندەگى قازاقستاندىق ءانشى ديماش قۇدايبەرگەننىڭ ونەرىن نازاردان تىس قالدىرمادى.

تريلوگيا 18-قىركۇيەكتە لاس-ۆەگاستا ءوتتى جانە 12 راۋندقا سوزىلدى. شەتەلدىك كورەرمەن مەن جەلى قولدانۋشىلارى ديماشتىڭ ورىنداۋىنداعى قازاقستان ءانۇرانىنا ءتانتى بولىپ، ونىڭ ونەرىنەن كەيىنگى اسەرلەرىن ءبولىستى.

مەكسيكالىق TUDN پورتالى «كانەلو - GGG: قازاقستان ءانۇرانىن كىم شىرقادى» دەگەن ماقالا جاريالادى. ماقالا اۆتورلارى قازاقستاندىق ءانشىنىڭ ونەرىنەن كەيىن، Twitter جەلىسىندە مەكسيكالىقتار اراسىندا جاڭا ترەند پايدا بولعانىن اتاپ ءوتتى. پورتال مەكسيكالىق جەلى قولدانۋشىلارى ديماشتىڭ ونەرىنە ءتانتى بولعانىن اتاپ ءوتتى.

يسپانيانىڭ بەلگىلى Marca سپورت باسىلىمى «ديماش قۇدايبەرگەن قازاقستان ءانۇرانىن اسەرلى ورىنداپ شىقتى» دەگەن ماقالا جاريالادى. ولار ءانشىنىڭ داۋىسى ارەناعا جينالعانداردىڭ ءبارىن تاڭعالدىرعانىن اتاپ ءوتتى. پورتال ءان ورىندالعان سوڭ ءبارى ونەر يەسىنە دۋ قول شاپالاق ۇرعانىن جازادى.

تاعى ءبىر مەكسيكالىق پورتال - AS México دا قازاقستاندىق ءانشىنىڭ جارقىن ونەرىن اتاپ ءوتىپ، ونىڭ شىعارماشىلىعىن قىسقاشا ومىربايانىمەن تانىستىرىپ وتكەن.

Mexico ES Euro News پورتالى ديماش قۇدايبەرگەن ءانۇراندى ورىنداپ، بارشا كورەرمەندى تاڭعالدىردى دەپ جازادى. ماقالا اۆتورلارى ءانشىنىڭ ەرەكشە داۋىس تەمبرىمەن تانىلىپ، ءتۇرلى ۆوكالدىق بايقاۋلارعا قاتىسقانىن اتاپ ءوتتى. ماقالا سوڭىندا قازاقستان ءانۇرانىنىڭ يسپان تىلىنە اۋدارماسى ۇسىنىلعان.

ESPN Knockout سپورت پورتالى Twitter- پاراقشاسىندا ءانۇران ورىنداپ جاتقان ءانشىنىڭ سۋرەتىن جاريالاعان.

SportsCenter سپورت پورتالى دا قازاقستاندىق ونەرپازدىڭ ونەرىن نازاردان تىس قالدىرمادى.

ايتا كەتەيىك، قازاقستاندىق ءانشىنىڭ ونەرىن جەلى قولدانۋشىلارى دا قىزۋ تالقىلاپ، Twitter- دە ءوز رەاكسياسىن قالدىرىپ جاتىر. سونىمەن، ارگەنتينالىق قولدانۋشىلاردىڭ ءبىرى ديماشتىڭ ونەرىنە قاتىستى بىلاي دەپ پىكىر بىلدىرگەن.

«كەرەمەت، تاڭعالارلىق، سيقىرلى. ول الەمدەگى ەڭ جاقسى ءانشى!!! ديماشقا بولا ارگەنتينادان جەكپە-جەكتى كوردىم جانە سونىڭ ارقاسىندا GGG چەمپيونىمەن تانىستىم»، - دەيدى قولدانۋشى.

«كانەلونىڭ جەكپە-جەگىن كورۋگە بارىپ، قازاق انشىسىنە ءتانتى بولدىم! مەن مۇنداي كەرەمەت داۋىستى ەستىگەن ەمەسپىن!» - دەدى مەكسيكالىق قولدانۋشىلاردىڭ ءبىرى.

ءانشىنىڭ كوستا-ريكادان كەلگەن جانكۇيەرلەرى دە ونىڭ ونەرىن نازاردان تىس قالدىرعان جوق. «ديماش، ءبىز سەنى جاقسى كورەمىز» دەلىنگەن ولاردىڭ جازباسىندا.

ديماش قۇدايبەرگەن - ءانشى، كومپوزيتور جانە مۋلتياسپاپشى. بۇكىل الەمگە قازاقستاندىق ءانشى رەتىندە تانىمال. ول قىتايلىق I am Singer مۋزىكالىق بايقاۋىنا قاتىسقاننان كەيىن كەڭىنەن تانىمال بولدى.

Tengrinews.kz