بريۋسسەل تۇرعىندارى مەن قوناقتارى قازاق مادەنيەتىمەن جاقىنىراق تانىستى - فوتو
«ديپلوماتيالىق وكىلدىكتىڭ عيماراتىنا كىرەبەرىستە كەلۋشىلەر قازاقستاندىق فوتوگرافتار تۇسىرگەن ەلىمىزدىڭ قالالارى مەن تابيعاتىنىڭ، وتانداستاردىڭ كۇندەلىكتى تىرشىلىگىن كورسەتەتىن كولەمدى فوتوسۋرەتتەرمەن تانىستى. ەۋروپالىق وداق استاناسىنىڭ جۇزدەگەن تۇرعىندارى مەن قوناقتارى قازاق كيىز ءۇيىنىڭ جابدىقتارىمەن جانە ەلىمىزدىڭ باي مادەنيەتى مەن الۋان ءتۇرلى تابيعاتىن بەينەلەيتىن كورمەمەن جاقىنىراق تانىسىپ، دومبىرا ءۇنىن تىڭداپ، قازاقتىڭ ۇلتتىق كيىمدەرىن كيىپ، ەستەلىك سۋرەتكە ءتۇستى. اتاقتى وتانداستارىمىز - بوكسشى گەنناديي گولوۆكين مەن ءانشى ديماش قۇدايبەرگەننىڭ فوتوسۋرەتتەرى دە كوپشىلىكتىڭ نازارىنا ىلىكتى. قازاقستاندىقتاردىڭ قوناقجايلىعىن جانە ءبىزدىڭ ءداستۇرلى تاعامدارىمىزدىڭ كەرەمەت ءدامىن جوعارى باعالادى»، - دەپ جازدى ق ر سىرتقى ىستەر مينيسترلىگىنەن.
ەلشىلىك قوناقتارى، ونىڭ ىشىندە بەلگيالىق ساياساتكەرلەر، كاسىپكەرلەر، ديپلوماتتار، ەلىمىزدىڭ مۋزىكالىق ونەرىمەن، ەلدىڭ تۋريستىك الەۋەتى، قازاقستاندىق سەرىكتەستەرمەن ىسكەرلىك بايلانىستاردى ورناتۋ جانە نىعايتۋ مۇمكىندىكتەرى تۋرالى سۇراقتار قويدى. كەيبىرەۋلەرى الەمدىك جانە ءداستۇرلى دىندەر ليدەرلەرىنىڭ VII سەزىنە قاتىسۋ ءۇشىن ريم پاپاسى فرانتسيسكتىڭ جاقىندا استاناعا جاساعان مەملەكەتتىك ساپارى ارقىلى قازاقستانعا قىزىعۋشىلىق تانىتقانىن ايتىپ، قازىرگى الەمدە ديالوگ پەن ءوزارا تۇسىنىستىك مادەنيەتىن نىعايتۋعا باعىتتالعان وسىنداي باستامالاردىڭ وزەكتىلىگىن اتاپ ءوتتى.
جىل سايىن قىركۇيەكتىڭ ورتاسىندا اتاپ وتىلەتىن «ەۋروپالىق مۇرالار كۇندەرىنە» العاش رەت قاتىسقان قازاقستاننىڭ بريۋسسەلدەگى ەلشىلىگى بەلگيا مەن ەۋرووداقتىڭ استاناسىندا ەلىمىزدىڭ باي مادەنيەتىن، تۋريستىك جانە ينۆەستيتسيالىق الەۋەتىن تانىستىرۋ ماقساتىنداعى بەلسەندى جۇمىسىن جالعاستىرۋدا.
