قاسىم-جومارت توقايەۆ: سانكسيالار مەن كۇش قولدانۋ ماسەلەنى شەشپەيدى
بۇل تۋرالى مەملەكەت باسشىسى قاسىم-جومارت توقايەۆ الەمدىك جانە ءداستۇرلى دىندەر ليدەرلەرىنىڭ سەزىندە ايتتى، دەپ حابارلايدى قازاقپارات ءتىلشىسى.
بۇعان دەيىن قاسىم-جومارت توقايەۆ كوروناۆيرۋستان كەيىن تۋىنداعان جاھاندىق ماسەلەلەردى اتاعان ەدى.
«سوڭعى بىرنەشە ونجىلدىقتارداعى تابيعي اپاتتار، اسىرەسە كليماتتىڭ وزگەرۋىمەن جانە ولاردىڭ سالدارىمەن بايلانىستى وزگەرىستەر شامامەن 3 تريلليون ا ق ش دوللارىنا باعالاندى. وعان قوسا، وكىنىشكە وراي، سەنىمسىزدىك، شيەلەنىستەر مەن قاقتىعىستار حالىقارالىق قاتىناستارعا قايتا ورالدى»، - دەدى پرەزيدەنت «الەمدىك جانە ءداستۇرلى دىندەر ليدەرلەرىنىڭ پاندەميادان كەيىنگى كەزەڭدەگى ادامزاتتىڭ رۋحاني جانە الەۋمەتتىك دامۋىنداعى ءرولى» پلەنارلىق وتىرىسىندا.
ءوز سوزىندە مەملەكەت باسشىسى بۇل ماسەلەلەردە نە نارسەگە سۇيەنۋ كەرەكتىگىن ايتتى.
«بۇگىنگى سىن- قاتەرلەرمەن كۇرەسۋ ءۇشىن ءبىز نە نارسەگە سۇيەنە الامىز؟ تاريح ءبىر عانا جاۋاپ بەرەدى - ىزگى نيەت، ديالوگ جانە ىنتىماقتاستىق. تابىسقا جەتۋدىڭ باسقا بالاماسى جوق. قازاقستان ءاردايىم كەلىسپەۋشىلىكتەردى ب ۇ ۇ جارعىسى رۋحىندا كەلىسسوزدەر ۇستەلىندە رەتتەۋگە تىرىستى. سانكسيالار، سانكسيالار قاۋپى جانە كۇش قولدانۋ ەشقاشان ماسەلەنى شەشپەيدى»، - دەدى ق. توقايەۆ.
ايتا كەتەيىك، بۇگىن ەلوردادا الەمدىك جانە ءداستۇرلى دىندەر ليدەرلەرىنىڭ VII سەزى ءوتىپ جاتىر. ەكى كۇنگە سوزىلاتىن سەزگە 50 ەلدەن 100 دەن استام دەلەگاتسيا، ونىڭ ىشىندە يسلام، حريستيان، بۋدديزم، يۋدايزم، يندۋيزم، داوسيزم، زورواستريزم، سينتويزم دىندەرىنىڭ وكىلدەرى، سونداي-اق ساياسي جانە قوعام قايراتكەرلەرى، حالىقارالىق ۇيىمدار مۇشەلەرى كەلگەن.
ءدىني فورۋمعا ريم پاپاسى فرانسيسك، ءال-ازحاردىڭ جوعارعى يمامى احمەد موحاممەد احمەد ات- تايەب، يەرۋساليم پاتريارحى III تەوفيل، اشكەنازدىڭ باس راۆۆينى داۆيد لاۋ، يزرايلدىڭ باس سەفارد ءراۆۆينى يسحاك يوسيفتىڭ جانە باسقا دا ءدىني جەتەكشىلەر، سونداي-اق ءبىرقاتار حالىقارالىق ۇيىمنىڭ وكىلدەرى قاتىسۋدا.
