ق ح ر ءتوراعاسىنىڭ ساپارى ءوزارا ساياسي سەنىمنىڭ جاڭا ىرگەتاسىن قالايدى - قازاقستانداعى ق ح ر ەلشىسى
بۇل تۋرالى قىتايدىڭ قازاقستانداعى ەلشىسى چجان سياو مالىمدەدى، دەپ حابارلايدى قازاقپارات.
قازاقستان پرەزيدەنتى قاسىم-جومارت توقايەۆتىڭ شاقىرۋىمەن قىتاي حالىق رەسپۋبليكاسىنىڭ ءتوراعاسى شي جينپيڭ 14- قىركۇيەكتە قازاقستانعا مەملەكەتتىك ساپارمەن كەلەدى. ەلشى اتاپ وتكەندەي، الداعى ساپار قىتاي مەن قازاقستان اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىمەن تۇسپا-تۇس كەلىپ وتىر.
«بۇل ءتوراعا شي جينپيڭنىڭ COVID-19 باستالعالى العاشقى شەتەلدىك ساپارى. ساپار قىتاي مەن قازاقستان قاتىناستارىنىڭ 30-مەرەيتويىن اتاپ وتەدى. 1992-جىلى قىتاي مەن قازاقستان ديپلوماتيالىق قاتىناستار ورناتۋ تۋرالى كومميۋنيكەگە قول قويدى. سوڭعى 30 جىلدا قىتاي-قازاقستان بايلانىستارى ەكى ەلدىڭ حالىقتارىنا پايدا اكەلىپ قانا قويماي، وڭىردەگى بەيبىتشىلىك پەن تۇراقتىلىققا ماڭىزدى ۇلەس قوسىپ، كورشى ەلدەر اراسىنداعى تاتۋ كورشىلىك دوستىقتىڭ ۇلگىسى بولدى، زاماناۋي قارقىندى دامۋعا قول جەتكىزدى»، - دەدى چجان سياو.
ەلشى قازىرگى الەمنىڭ قارقىندى وزگەرىستەردىڭ جاڭا كەزەڭىنە اياق باسقانىن اتاپ ءوتتى. ونىڭ ايتۋىنشا، ساپار بارىسىندا ەكى ەلدىڭ كوشباسشىلارى قىتاي مەن قازاقستان قاتىناستارىنىڭ دامۋ پەرسپەكتيۆالارىن تالقىلايدى، ءىس-قيمىل جوسپارىن بىرلەسىپ ازىرلەيدى جانە ەكىجاقتى قاتىناستاردىڭ تۇراقتى جانە ۇزاقمەرزىمدى ىلگەرىلەۋىنە جانە ولاردىڭ جاڭا دەڭگەيگە كوشۋىنە ىقپال ەتپەك.
«بۇل ساپار قىتاي مەن قازاقستاننىڭ ساياسي ءوزارا سەنىمىنىڭ جاڭا ىرگەتاسىن قالايدى. 30 جىل بۇرىن ديپلوماتيالىق قارىم-قاتىناس ورناعان ساتتەن باستاپ، ەكى ەل ءبىر-ءبىرىن سەنىمدى دوستار جانە باۋىرلار سياقتى جاقىن كورشىلەر رەتىندە قاراستىرىپ، قوس تاراپتىڭ نەگىزگى مۇددەلەرىن قوزعايتىن ماسەلەلەردە قولداۋ كورسەتتى»، - دەپ اتاپ ءوتتى قىتاي ەلشىسى.
قازىرگى ۋاقىتتا قىتاي «ءبىر بەلدەۋ، ءبىر جول» باستاماسى بويىنشا 149 ەلمەن جانە 32 حالىقارالىق ۇيىممەن ىنتىماقتاستىق تۋرالى 200 دەن استام قۇجاتقا قول قويدى. بيىلعى مامىر ايىنداعى جاعداي بويىنشا بۇل باعىتتار بويىنداعى ەلدەرمەن تاۋار ساۋداسىنىڭ جالپى كولەمى شامامەن 11,8 تريلليون ا ق ش دوللارىنا جەتتى. تىكەلەي ينۆەستيتسيالار 140 ميلليارد ا ق ش دوللارىنان اسادى.
«بۇل ساپار قىتاي مەن قازاقستاننىڭ ىسكەرلىك ىنتىماقتاستىعىن جاڭا بەلەسكە شىعارادى. قىتاي مەن قازاقستان ەكونوميكالىق تۇرعىدا ءبىر-ءبىرىن تولىقتىرادى جانە ىنتىماقتاستىق ءۇشىن زور الەۋەتى بار. 1992-جىلدان 2021-جىلعا دەيىن قىتاي-قازاقستان ساۋداسى 368 ميلليون ا ق ش دوللارىنان 25,25 ميلليارد ا ق ش دوللارىنا دەيىن 70 ەسەگە جۋىق ءوستى»، - دەدى ەلشى.
بۇعان دەيىن اقوردا پرەزيدەنت قاسىم-جومارت توقايەۆتىڭ شاقىرۋىمەن 14- قىركۇيەك كۇنى ەلىمىزگە قىتاي حالىق رەسپۋبليكاسىنىڭ ءتوراعاسى شي جينپيڭ مەملەكەتتىك ساپارمەن كەلەتىنىن حابارلاعان ەدى.
رەسمي اقپاراتقا سايكەس، قازاقستان مەن قىتاي باسشىلارى قازاق- قىتاي ستراتەگيالىق سەرىكتەستىگىن جان- جاقتى نىعايتۋدىڭ پەرسپەكتيۆالارىن تالقىلايدى. كەلىسسوزدەردەن كەيىن ءبىرقاتار ەكىجاقتى قۇجاتقا قول قويۋ جوسپارلانىپ وتىر.
