اعىلشىن تىلىندە شىققان «احمەت بايتۇرسىن ۇلى جانە الاش» كىتابى لوندوندا تانىستىرىلدى - فوتو
شارادا اعىلشىن تىلىنە العاش رەت اۋدارىلعان «احمەت بايتۇرسىن ۇلى جانە الاش» كىتابىنىڭ تۇساۋى كەسىلدى. بريتانيالىق شىعارماشىلىق ينتەلليگەنتسيا ۇلت ۇستازىنىڭ ومىربايانىمەن جانە ەڭبەكتەرىمەن تانىسىپ، پىكىر ءبولىستى، دەيدى قازاقپارات ءتىلشىسى.
«احمەت بايتۇرسىن ۇلى جانە الاش» كىتابىن اعىلشىن تىلىنە ءتارجىمالاعان اۋدارماشىلاردىڭ ءبىرى - ارچ تەيت. ول بۇعان دەيىن شوقان ءۋاليحانوۆتىڭ تاڭدامالى شىعارمالارىن دا اۋدارعان. ءبىراق ءتۇپنۇسقا تىلدەن ەمەس، ورىس تىلىنەن. تەيت قازاقتىڭ باي مۇراسىن سول قالپىندا جەتكىزۋ ءۇشىن ەندى قازاقشا مەڭگەرۋ قاجەتتىگىن ايتادى.
«قازاق ءتىلىن ۇيرەنگىم كەلەدى. بايتۇرسىن ۇلىنىڭ شىعارمالارى مەنىڭ تىلگە دەگەن ماحابباتىمدى وياتتى»، - دەيدى ول.
بۇدان بولەك، ول حالقىمىزدىڭ باسىنان وتكەن، ءبىراق تاريح تاساسىندا قالىپ قويعان كوپتەگەن بەيمالىم دەرەكتەر الەم جۇرتشىلىعىنىڭ نازارىنا ۇسىنىلۋ كەرەك دەگەن پىكىردە.
«مەنىڭشە، بۇل كىتاپ قازاقستان تاريحىنداعى اقتاڭداقتاردىڭ بەتىن اشىپ، قازاق ءتىلى مەن ادەبيەتى تۋرالى ماڭىزدى اقپاراتتى اعىلشىن ءتىلدى اۋديتورياعا پاش ەتەدى. احمەت بايتۇرسىن ۇلى رەسەي پاتشالىعى زامانىندا قۋدالاۋعا ۇشىراسا دا، تۇرمەگە توعىتىلسا دا جۇرەكجۇتقان جان بولعان. ول ءوزىنىڭ ميسسياسىنا ادال بولىپ، قازاق ۇلتى ءۇشىن باسىن بايگەگە تىككەن ادام»، - دەيدى ارچ تەيت.
قازاقستاننىڭ بىرىككەن كورولدىكتەگى ەلشىلىگى ۇيىمداستىرعان شاراعا بريتانيالىق شىعارماشىلىق ينتەلليگەنتسيا وكىلدەرى قاتىستى. اعىلشىن اقىن-جازۋشىلارىنا، اۋدارماشىلارىنا احمەت بايتۇرسىن ۇلىنىڭ ءومىرى جانە شىعارماشىلىعىمەن تەرەڭىرەك تانىسۋعا جاعداي جاسالدى.
«مەن بايتۇرسىن ۇلىنىڭ شىعارمالارىمەن ەندى تانىسىپ جاتىرمىن. ونىڭ قازاق حالقىنىڭ ءبىرتۋار ۇلى، ۇلت رەفورماتورى، وقۋ- اعارتۋ ءىسىنىڭ ءدۇلدۇلى بولعانىن ءبىلدىم. بۇل تۋرالى ەۋروپالىق وقىرماندار دا حاباردار بولۋى كەرەك دەپ ويلايمىن. مەنىڭشە، شەتەلدىكتەر وسىنداي كىتاپتاردىڭ ارقاسىندا قازاقستان تاريحىمەن جانە عۇلامالارىمەن تانىسۋعا مول مۇمكىندىك الادى»، - دەيدى اعىلشىن جازۋشىسى ءارى اۋدارماشىسى دجون فارندون.
كىتاپتى ۇلتتىق اۋدارما بيۋروسى باسىپ شىعارعان. جيناققا قازاق ادەبيەتى جانە مادەنيەتى كورنەكتى قايراتكەرلەرىنىڭ احمەت بايتۇرسىن ۇلى تۋرالى جازعان ەڭبەكتەرى ەنگەن. ىشىنىنەن مۇحتار اۋەزوۆ، ءمىرجاقىپ دۋلاتوۆ، ساكەن سەيفۋلليننەن بولەك، مامبەت قويگەلدى، دارحان قىدىرالى، ديحان قامزابەك ۇلى سياقتى قازىرگى الاشتانۋشى عالىمداردىڭ زەرتتەۋلەرىن دە تابۋعا بولادى.
عالىمجان قارامان ۇلى
