ەگدە ادامدار الجۋدان قالاي ساقتانا الادى
«قاراپايىم نارسەلەردى ۇمىتىپ، كۇندەلىكتى تۇرمىستا كەزدەسەتىن كىشىگىرىم ماسەلەلەرگە قاتىستى شەشىم قابىلداۋدا قينالاتىن بولساڭىز، دارىگەرگە قارالعانىڭىز ءجون. سەبەبى، بۇل ۇمىتشاقتىعىڭىز قارتايۋمەن عانا ەمەس، ءومىر ءۇشىن قاۋىپتى اۋرۋلارمەن بايلانىستى بولۋى مۇمكىن. كۇندەلىكتى جاتتىعۋ جاساۋ ارقىلى اقىل كەمىستىگىنىڭ الدىن الاسىز»، - دەيدى روچەستەردەگى مايو كلينيكاسىنىڭ دارىگەرى رونالد پەتەرسەن.
سوڭعى جىلدارى بىرنەشە توپ عالىم زەرتتەۋ جۇمىستارى بارىسىندا سپورت جاتتىعۋلارىنىڭ مي جۇمىسىن جاقسارتاتىنىن انىقتادى. مىسالى، 2008 -جىلى اۆستراليالىق عالىمدار قاريالاردىڭ كۇندەلىكتى 50 مينۋت سەرۋەندەۋ ارقىلى ەستە ساقتاۋ قابىلەتىن جاقسارتا الاتىندارىن ايتقان. بۇدان كەيىن 2015 -جىلى يتاليالىق عالىمدار فيزيكالىق جاتتىعۋلاردىڭ جۇيكە جاسۋشالارىنىڭ باسقا نەيروندارمەن جاڭا بايلانىس قۇرۋعا اسەر ەتەتىنىن انىقتادى.
پەتەرسوننىڭ ايتۋىنشا، مۇنداي زەرتتەۋ جۇمىستارىنا ەكى كاتەگورياداعى ادامدار قاتىسقان. ولار - ستۋدەنتتەر، جاسوسپىرىمدەر جانە التسگەيمەر اۋرۋىنا شالدىقپاعان دەنى ساۋ ەرەسەك ادامدار. زەرتتەۋ جۇمىسىنىڭ ناتيجەسىندە دارىگەرلەر تازا اۋادا سەرۋەندەۋ مەن وزگە دە جەڭىل جاتتىعۋلاردىڭ ەگدە ادامداردىڭ ەستە ساقتاۋ قابىلەتىن جاقسارتۋعا كومەكتەسەتىنى انىقتالدى. عالىمنىڭ ەسەپتەۋىنشە، ەگدە ادامدار دەنساۋلىقتارىن جاقسارتۋ ءۇشىن اپتاسىنا 150 مينۋت جاتتىعۋ جاساۋلارى كەرەك.
«قارتايۋعا ءبىز ەش اسەر ەتە المايتىن پاسسيۆتى پروتسەسس رەتىندە قاراۋدىڭ قاجەتى جوق. مىسالى، 72 جاسىمدا ەستە ساقتاۋ قابىلەتىم ناشارلاي باستاسا، سپورتپەن شۇعىلدانۋ ارقىلى بۇل پروتسەسستى 75-78 جاسىما دەيىن شەگەرە الامىن. بۇل مەن ءۇشىن وتە ۇلكەن ايىرماشىلىق»، - دەيدى پەتەرسەن.
