سەناتور ءار مەكتەپتىڭ تورىنە احمەت بايتۇرسىن ۇلىنىڭ پورترەتىن ءىلىپ قويۋدى ۇسىندى

نۇر-سۇلتان. قازاقپارات – ق ر پارلامەنتى سەناتىنىڭ دەپۋتاتى التىنبەك نۇح ۇلى احمەت بايتۇرسىن ۇلىنىڭ پورترەتىن ەلدەگى بۇكىل مەكتەپتەردىڭ تورىنە ءىلىپ قويۋدى ۇسىندى، دەپ حابارلايدى قازاقپارات ءتىلشىسى.

مۇنداي باستامانى ول ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە وتكەن «احمەت بايتۇرسىن ۇلىنىڭ عىلىمي مۇراسى جانە جاڭا قازاقستاننىڭ زياتكەرلىك ساباقتاستىعى» اتتى حالىقارالىق عىلىمي-پراكتيكالىق كونفەرەنسيادا كوتەردى.

«احمەت بايتۇرسىن ۇلىنىڭ وسىدان تۋرا ءبىر عاسىر بۇرىن العاشقى وقۋ-اعارتۋ ءمينيسترى بولا ءجۇرىپ ايتقان مىناداي ساليقالى ءسوزى بار. «مەكتەپتىڭ جانى - مۇعالىم»، - دەيدى. ەندەشە وسىنداي مارعاسقا مۇعالىمنىڭ پورترەتىن قازاقستاننىڭ ءاربىر مەكتەبىندە، وسى سوزدەرمەن بىرگە نەگە ءىلىپ قويماسقا؟ بۇل ۇسىنىستى سىزدەردىڭ قولداۋلارىڭىزبەن بۇگىنگى وقۋ-اعارتۋ ءمينيسترى اسحات ايماعامبەتوۆكە جەتكىزۋگە ۋادە بەرەمىن»، - دەدى دەپۋتات.

كونفەرەنسيادان كەيىن عالىم قازاقپارات تىلشىسىنە بۇل ۇسىنىسىنىڭ ءمانىن ءتۇسىندىردى.

«مەكتەپكە كەيىنگى 20 جىلدا ساياسات كىرىپ كەتكەن كەزدەر بولدى. ولاي بولماۋى كەرەك. ءبىلىم وشاقتارىنىڭ تورىندە ساياسي ۇراندار مەن نىشاندار ەمەس، ۇلتتى اعارتۋ جولىندا جانىن پيدا ەتكەن احمەت بايتۇرسىن ۇلىنىڭ سۋرەتى تۇرسا ورىندى. قازاقستاندا 4 مىڭنان استام مەكتەپ بار دەسەك، سونىڭ ءارقايسىسىندا احمەت بايتۇرسىن ۇلىنىڭ پورترەتى مەن قاناتتى ءسوزى ءىلىنۋى كەرەك. بۇل ۇسىنىستى كونفەرەنسياعا قاتىسۋشىلار قولداعانىن وزدەرىڭىز كوردىڭىزدەر. مينيسترگە ەلدىڭ تىلەگىن جەتكىزەمىن»، - دەدى التىنبەك نۇح ۇلى.

سونداي-اق، ول كونفەرەنسياعا قاتىسىپ وتىرعان مادەنيەت جانە سپورت ءمينيسترى داۋرەن ابايەۆقا استانا تورىنەن بوي كوتەرەتىن احمەت بايتۇرسىن ۇلىنىڭ ەسكەرتكىشىن ەڭسەلى ەتىپ ورناتۋعا كۇش سالساڭىز دەگەن ۇسىنىس ايتتى.

«قۇرامىندا بىرنەشە دەپۋتات پەن ەلگە بەلگىلى تۇلعالار بار احاڭ اتىنداعى قوعامدىق قور قۇرعان بولاتىنبىز. سول كىسىلەردىڭ ءوتىنىشىن وسى مۇمكىندىكتى پايدالانىپ ايتىپ وتەيىن. ەلوردا تورىندە اشىلاتىن احمەت بايتۇرسىن ۇلى ەسكەرتكىشى ەڭسەلى ءارى ءزاۋلىم بولۋى كەرەك. مۇنداي ەسكەرتكىشتى قازاق عىلىمىنىڭ اتاسى، العاشقى اكادەميك قانىش ساتپايەۆقا اشقانىمىزدى ءبارىڭىز بىلەسىزدەر. ەندى عىلىمنىڭ نەگىزى، ءبىلىمنىڭ اتاسى احاڭنىڭ ەسكەرتكىشى دە وسىنداي ءزاۋلىم بولسا ەكەن دەپ تىلەيمىز. داۋرەن اسكەربەك ۇلى (مادەنيەت جانە سپورت ءمينيسترى داۋرەن ابايەۆ - اۆت.) وسى ەسكەرتكىشتىڭ سوڭعى نۇكتەسىن، شەشىمىن شىعاراتىن - ءسىزدىڭ مينيسترلىك. بۇل حالىقتىڭ ءوتىنىشى. كىشكەنتاي عانا ەسكەرتكىش بولماسىن. ءبىز احمەت بايتۇرسىن ۇلى كوشەسىمەن ارنايى ءجۇرىپ وتتىك. ءۇش ورىننىڭ ىشىندە ەڭ ىڭعايلىسى جاڭادان اشىلعان قازاق دراما تەاترىنىڭ قاسىنان سالىنىپ جاتقان ۇلكەن اللەيانىڭ بويىندا بولسا دەگەن ءۇمىتىمىز بار. سونى ەسكەرسەڭىزدەر»، - دەدى سەناتور.

ايتا كەتەيىك، بۇگىن احمەت بايتۇرسىن ۇلىنىڭ تۋعانىنا تۋرا 150 جىل تولدى.