قازاقستاندا احمەت بايتۇرسىن ۇلى اتىندا قانشا اۋىل، قانشا كوشە، قانشا مەكتەپ بار
«ءبىزدىڭ مينيسترلىك ۇلت ۇستازى احمەت بايتۇرسىن ۇلىنىڭ 150 جىلدىق مەرەيتويىنا وراي 12 تومدىق شىعارمالار جيناعىن شىعارىپ، رەسپۋبليكالىق، وبلىستىق، اۋداندىق كىتاپحانالارعا تاراتادى. سونىمەن قاتار اعارتۋشىنىڭ ءومىرى مەن شىعارماشىلىعى تۋرالى تولىق مەتراجدى كوركەم فيلم تۇسىرىلەدى. احمەت بايتۇرسىن ۇلىنىڭ ەسىمى رەسپۋبليكا كولەمىندە 1 اۋىلعا، 200 دەن استام كوشەگە، 39 مەكتەپكە، 1 اۋەجايعا جانە 1 مۋزەيگە بەرىلگەن. سونداي-اق، وسى ايدا احمەت بايتۇرسىن ۇلىنىڭ مۇراسىن جاس ماماندارعا ناسيحاتتاپ، كىتاپحانانىڭ مارتەبەسىن كوتەرۋ ماقساتىندا كىتاپحاناشىلاردىڭ رەسپۋبليكالىق ءتورتىنشى سلەتى وتەدى»، - دەدى ق ر مادەنيەت جانە سپورت ءمينيسترى داۋرەن ابايەۆ ەلوردادا احمەت بايتۇرسىن ۇلىنىڭ 150 جىلدىق مەرەيتويىنا وراي وتكەن عىلىمي-پراكتيكالىق حالىقارالىق كونفەرەنسيادا.
ودان بولەك، مينيستر مالىمدەگەندەي بيىلعى «التىن دومبىرا» اقىندار ايتىسىنا احمەت بايتۇرسىن ۇلى تاقىرىبى ارقاۋ بولماق.
«الماتىداعى احمەت بايتۇرسىن ۇلىنىڭ مۋزەي ۇيىنە عىلىمي رەستاۆراتسيالىق جۇمىس ءجۇرىپ جاتىر. جالپى ۇلت ۇستازىنىڭ 150 جىلدىق مەرەيتويى يۋنەسكو كولەمىندە اتالىپ وتىلەدى. احمەت بايتۇرسىن ۇلىنىڭ ارتىنا قالدىرعان دۇنيەسى ءبىزدىڭ باعا جەتپەس اسىل مۇرامىز»، - دەيدى ول.
بۇگىن نۇر-سۇلتاندا احمەت بايتۇرسىن ۇلىنىڭ 150 جىلدىق مەرەيتويىنا ارنالعان عىلىمي-پراكتيكالىق حالىقارالىق كونفەرەنسيا ءوتتى.
اتالعان شارا بارىسىندا احمەت بايتۇرسىن ۇلى اتىنداعى مەملەكەتتىك سىيلىقتىڭ تاعايىندالاتىنى بەلگىلى بولدى.
ودان بولەك، «ۇركەر» سىيلىعىنا اعارتۋشى اتىنداعى ارنايى نوميناتسيا ەنگىزىلمەك.
