احمەت بايتۇرسىن ۇلىنىڭ ەكى سىنىپتىق قانا ءبىلىمى بولعان با

نۇر- سۇلتان. قازاقپارات - ءالىپبي، ءتىل وقىتۋ ىسىندە احمەت بايتۇرسىن ۇلىنىڭ مۇراسى ەسكەرىلمەي جاتقانى ءسوز بولسا، الاش ارداقتىسىن ەكى سىنىپتىق قانا ءبىلىمى بار اۋەسقوي زەرتتەۋشىگە بالايتىن اڭگىمەلەر ايتىلىپ جاتادى.

بايتۇرسىن اۋلەتىمەن بىرگە الماتىداعى احمەت مۋزەي- ءۇيىنىڭ قۇرىلۋىنا جىلدار بويى اتسالىسقان، قازىر سوعان جەتەكشىلىك ەتىپ وتىرعان احمەتتانۋشى رايحان يماحانبەت وسىنداي الىپقاشپا اڭگىمەلەرگە جاۋاپ بەردى.

«احمەتتىڭ جوعارى ءبىلىم جوق دەيتىن «دانىشپاندار» پايدا بولىپتى. احمەت بايتۇرسىن ۇلىنىڭ جوعارى ءبىلىمى بار. جوعارى ءبىلىمى جوق بولسا، ول قازىرگى اباي ۋنيۆەرسيتەتىندە ساباق بەرمەس ەدى عوي. شىن مانىندە ول - اتالمىش ۋنيۆەرسيتەتتىڭ تۇڭعىش پروفەسسورلارىنىڭ ءبىرى. سول جەردە ءبىر كافەدرا ءبولىمىن باسقارعان. ونىڭ قۇجاتتارى مۋزەيدە ساقتاۋلى. ول كىسى وقىعان ورىنبورداعى مۇعالىمدەر مەكتەبى ءبىزدىڭ بۇگىنگى جوعارى وقۋ ورىندارىمەن پارا- پار. بەس جىل سوندا ءبىلىم العان»، - دەيدى رايحان يماحانبەت.

عالىم احمەت ەكى سىنىپتىق قانا ءبىلىم العان دەگەن اڭگىمەنىڭ قايدان شىققانىن دا ءتۇسىندىردى.

«ورىنبورعا دەيىن التى جىل وقىعان مەكتەبى قازىرگى كوللەدج، ۋچيليشەلەردىڭ دەڭگەيىندە ساباق بەرگەن. ءوزى دە ۋچيليشە دەپ اتالعان. ەكى سىنىپتىق دەپ جۇرگەندەرى ەكى باسقىشتى ءبىلىم ەدى. ءۇش جىل باستاۋىش، ءۇش جىل ورتا ءبىلىم العان. سوندا ورىنبورعا دەيىن التى جىل وقىعان. وعان ۇڭىلمەستەن، احمەت مىنا جاقتا ەكى جىل، ورىنبوردا بەس جىل عانا وقىعان دەپ قيىستىرىپ جۇرگەندەر بار. ولاي ەمەس، احمەت 9 جىل ءبىلىم العان. ال ونىڭ الدىندا اۋىل مەكتەبىنەن ءتىلىن سىندىرىپ كەلگەن»، - دەيدى احمەتتانۋشى.

ايتا كەتەيىك، 5 -قىركۇيەكتە احمەت بايتۇرسىن ۇلىنىڭ دۇنيەگە كەلگەنىنە 150 جىل تولدى.

اشىق كوزدەردەن الىنعان فوتو

اۆتور

ەسىمجان ناقتىباي