ەلوردادا احمەت بايتۇرسىن ۇلىنىڭ مول مۇراسىنا ارنالعان عىلىمي كونفەرەنسيا ءوتىپ جاتىر
ايتۋلى شاراعا ق ر عىلىم جانە جوعارى ءبىلىم ءمينيسترى، ق ر مادەنيەت جانە سپورت ءمينيسترى، ق ر اقپارات جانە قوعامدىق دامۋ ءمينيسترى، عالىمدار، ۇستازدار جانە ستۋدەنتتەر قاتىسىپ جاتىر.
«بۇگىنگى عىلىمي كونفەرەنسياعا ا ق ش، ماجارستان، تۇركيا، وزبەكستان، باشقۇرتستان، رەسەيدەن عالىمدار قاتىسىپ جاتىر. ماقسات - احمەت بايتۇرسىن ۇلىنىڭ مۇراسىن جاڭا قازاقستاندا مەملەكەتشىل، يدەولوگيالىق، عىلىمي ينتەللەكتۋالدىق، مادەني تانىمدىق ىزدەنىسىن، تاجىريبەسىن، الەۋەتىن تانىمال ەتە ءتۇسۋ. احمەت مۇراسىنا قاتىستى جىل سوڭىنا دەيىن 12 تومدىق تۋىندى جارىق كورەتىنىن حابارلاعىم كەلەدى. بايتۇرسىن ۇلىنىڭ مەرەيتويى - ەرلىكتىڭ بەلەسى، گۋمانيتارلىق عىلىمنىڭ مارتەبەسى. احاڭنىڭ بەينەسى - كەشەگى، بۇگىنگى، بولاشاقتاعى قازاقستاننىڭ مادەني- ينتەللەكتۋالدى ايناسى. بايتۇرسىن ۇلىنىڭ مۇراسى - ەلدىكتىڭ، اسىرەسە گۋمانيتارلىق عىلىمنىڭ تۇجىرىمداسى»، - دەدى جيىندا ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ.
ونىڭ ايتۋىنشا، احمەت بايتۇرسىن ۇلى - تەك اعارتۋشى عانا ەمەس، قۇرۋشى، جاسامپاز، كورەگەن كىسى بولعان.
«احاڭنىڭ ءبىلىم، عىلىم، مادەنيەت سالاسىنداعى باستامالارىنىڭ بارلىعى «تۇڭعىش» دەگەن سوزدەن باستالادى. احمەت بايتۇرسىن ۇلى جانە ونىڭ ەڭبەكتەرى - مەملەكەتتىلىكتى جاڭعىرتۋدىڭ قۇرالى. تاعى ءبىر جايت، بايتۇرسىن ۇلى كەڭەس زامانىندا، بولشەۆيكتەردىڭ تۇسىندا دا «ءبىزدىڭ ءوز جولىمىز، ءوز مادەنيەتىمىز بار» دەپ مالىمدەپ كەتكەن. احمەت بايتۇرسىن ۇلى - ۋاقىت وتكەن سايىن بيىكتەي بەرەتىن ۇلتتىڭ رۋحاني ۇستازى»، - دەيدى ول.
سونداي-اق، شارا بارىسىندا ەرلان سىدىقوۆتىڭ «احمەت بايتۋرسىنوۆ - ۋچيتەل ناتسي» اتتى كىتابىنىڭ تۇساۋى كەسىلدى.
ەسكە سالا كەتەيىك، ب ۇگىن احمەت بايتۇرسىن ۇلىنىڭ تۋعانىنا 150 -جىل تولدى. وسىدان تۋرا 150 جىل بۇرىن قازىرگى قوستاناي وبلىسى جانگەلدى اۋدانى اقكول اۋىلىندا دۇنيەگە كەلگەن الاش ارىسىنىڭ بۇگىنگى مەرەيتويى يۋنەسكو كولەمىندە تويلانىپ، ءتۇيىنى ءوزى تۋعان ولكەدە قويىلۋى كەرەك بولعان ەدى.
