جاڭا ماۋسىمدا «جىبەك جولى» تەلەارناسى قانداي جوبالار ۇسىنادى
وسى ورايدا تەلەارنا ديرەكتورى كونستانتين حارلاموۆ تەلەارنانىڭ قانداي اۋديتورياعا ارنالعانىن، وندا قانداي جوبالار ازىرلەنىپ جاتقانىن ايتىپ بەردى، دەپ حابارلايدى قازاقپارات ءتىلشىسى.
ايتا كەتەيىك، «Jibek Joly» تەلەارناسى «قازاقستان رەسپۋبليكاسى پرەزيدەنتىنىڭ تەلەراديوكەشەنى» كەاق قۇرىلىمىنا كىرەدى. تەلەارنا تاۋلىگىنە 24 ساعات %55 قازاق جانە %45 ورىس تىلىندە حابار تاراتادى.
«ءبىز ءوز ارنامىزدا بالالار ءۇشىن دە، ەرەسەكتەر ءۇشىن دە ءتۇرلى جاستاعى كورەرمەندەرگە ساپالى تانىمدىق، ويىن- ساۋىق ونىمدەرىن ۇسىنۋعا دايىنبىز. وعان قوسا، بىزدە ارنايى فورماتتاعى جاڭالىقتار، ساياسي توك- شوۋلار، الەۋمەتتىك شوۋلار، ويىن- ساۋىق باعدارلامالارى بولادى. مەملەكەت باسشىسىنىڭ قىزمەتىن، باستامالارى مەن ولاردىڭ جۇزەگە اسۋىن كورسەتەتىن بولامىز. ءبىز كورەرمەندەرىمىزگە الۋان ءتۇرلى كونتەنت ۇسىناتىن وتباسىلىق ارنا قۇرامىز، وندا اركىم وزىنە قىزىقتى نارسە تابا الادى»، - دەيدى كونستانتين حارلاموۆ.
جاڭا ماۋسىمدا تەلەارنا اقپاراتتىق- ساراپتامالىق باعدارلامالار، ساياسي- الەۋمەتتىك توك- شوۋلار، دەرەكتى فيلمدەر، اۆتورلىق جوبالار، تانىمدىق جانە ويىن- ساۋىق باعدارلامالارىن، وتاندىق جانە شەتەلدىك ۇزدىك سەريالداردى ازىرلەپ وتىر.
اقپاراتتىق، قوعامدىق- ساياسي باعىتتا «جاڭا ۋاقىت»، «ساياسي توك- شوۋ» باعدارلامالارى جۇمىس كۇندەرى قازاق جانە ورىس تىلدەرىندە تىكەلەي ەفيردە كورسەتىلەدى. ونى تانىمال جۋرناليستەر - باقىت شويىمبەك پەن رۋسلان مەلەكشا جۇرگىزەدى. سونىمەن بىرگە، جۋرناليست ولگا سوي اپتا سايىن جۋرناليستىك زەرتتەۋ جۇرگىزىپ، ارنايى رەپورتاجدارىن ۇسىنادى.
تانىمال جۋرناليست، تەلەارنانىڭ بۇرىنعى ديرەكتورى مايا بەكبايەۆا «ناشا يستوريا» دەرەكتى- تاريحي جوباسىمەن ەفيرگە ورالادى. بەلگىلى پروديۋسەر، اكتەر، تەلەجۇرگىزۋشى نۇرلان قويانبايەۆ جۇرگىزگەن «تۇنگى ستۋديا» باعدارلاماسى «جاڭا تۇنگى ستۋديا» اتاۋىمەن قايتا جارىق كورەدى. ەسترادا جۇلدىزدارى قىدىرالى بولمانوۆ پەن قاراقات ءابىلدينا «جاقسى ادامدارىم» اتتى بەنەفيس- شوۋدى جۇرگىزەدى.
ودان بولەك، «شەتەلدەگى قازاق بالالارى» جوباسى كوپسەريالى دەرەكتى فيلم رەتىندە جالعاسىن تاپتى. بۇگىندە شەتەلدىكتەر اسىراپ العان 7 مىڭنان استام قازاق بالاسى الەمنىڭ 30-دان استام ەلىندە تۇرىپ جاتىر. اسىرەسە، ا ق ش، يسپانيا، بەلگيا ەلدەرى كوش باستاپ تۇر. باعدارلاما جۇرگىزۋشىسى جانار بايسەمىزوۆا ءبىرقاتار ەلگە بارىپ، بالالاردىڭ تۇرمىس- تىرشىلىگىمەن تانىسادى.
الەۋمەتتىك توك-شوۋ جانرىندا تانىمال اكتەر نارتاي ساۋدانبەك ۇلى «ەل» باعدارلاماسىن جۇرگىزەدى. ەفيردى ساپالى ونىمدەرمەن تولتىرۋ ءۇشىن باسقا دا قىزىقتى باعدارلامالار مەن تەلەحيكايالار تاڭدالعان.
«تەلەديدار كورمەۋ دەگەنىمىز ءسال ەكىۇشتى ۇعىم. قازىر ەشكىم تەلەديداردان سۇيىكتى باعدارلاماسىن، نەمەسە سۇيىكتى فيلمى مەن سەريالىن كۇتپەيتىنى تۇسىنىكتى، ويتكەنى مۇنىڭ ءبارىن ينتەرنەتتەن كورۋگە بولادى. دەگەنمەن، تەلەديدار ونىمىنە سۇرانىس بار. ارينە، ەلىمىزدەگى ۇلكەن مەدياكونتەنت بولعاندىقتان، ءبىز ءوزىمىزدى تانىتۋعا، كورەرمەنمەن جۇمىس ىستەۋگە دايىنبىز. بۇلدىرشىندەردەن باستاپ ەرەسەك بۋىنعا دەيىنگى كورەرمەن ءۇشىن جۇمىس ىستەيمىز. تەلەارنا ۇرانىنىڭ «جولىمىز ءبىر» دەپ ايتىلۋى كەزدەيسوق ەمەس. ياعني، ءبىز كورەرمەنمەن بىرگە تەلەديدار الەمىنە، ادەمى تاريحقا جول اشامىز، ونى جاساۋعا تىرىسامىز جانە مىندەتتى تۇردە جاسايمىز»، - دەيدى ارنا باسشىسى.
تەلەارنا باعدارلامالارى تىكەلەي ەفيردە، سونداي-اق YouTube پلاتفورماسىندا قولجەتىمدى بولادى. حالىقپەن كەرى بايلانىس الەۋمەتتىك جەلىلەر، تەلەكامەرالار ارقىلى جولعا قويىلعان.
«Jibek Joly» ەل اۋماعىندا كورسەتىلۋگە مىندەتتى تەلەارنالار تىزىمىنە ەنگەن. حالىقارالىق اۋديتورياعا دا ەفير ساقتالادى جانە ەلدەن تىس جەردە ترانسلياتسيا الەمنىڭ 120-دان استام ەلىندە جالعاسادى.
ايتا كەتەيىك، «QazaqTV» تەلەارناسى رەبرەندينگ جاساپ، اتاۋى «Jibek Joly» بولىپ وزگەردى. تەلەارنانىڭ اتاۋى عانا ەمەس، حابار تاراتۋ كەستەسى دە وزگەردى. ەندىگى ۋاقىتتا «Jibek Joly» تەلەارناسىن تەلەديدار پۋلتىنىڭ 7 سانىن باسۋ ارقىلى كورۋگە بولادى.
Kazakh TV قازاقستان رەسپۋبليكاسىنىڭ تۇڭعىش ۇلتتىق سپۋتنيكتىك تەلەارناسى بولدى. تەلەارنا 2002 -جىلى 25-قازاندا Caspionet دەگەن اتپەن ەفيرگە شىعا باستادى. ەل يميدجىن كوتەرۋگە بەت بۇرعان ارنا 2012 -جىلدىڭ 1-قىركۇيەگىندە Kazakh TV بولىپ وزگەرتىلدى. 2017 -جىلدىڭ 16-قاراشاسىندا Kazakh TV تەلەارناسى جاڭا فورماتقا - قازاق، ورىس جانە اعىلشىن تىلدەرىندە كوپارنالى حابار تاراتۋعا كوشتى.
2018 -جىلدىڭ 1-مامىرىنان باستاپ قولدانىستاعى ءۇش تىلگە ءتورتىنشىسى - قىرعىز ءتىلى قوسىلدى. 2018 -جىلدىڭ 28-قاراشاسىندا ارنا وزبەك تىلىندە حابار تاراتا باستادى. كوپارنالى سيگنال ساندىق تەلەديداردىڭ ءار ابونەنتىنە اتالعان تىلدەردىڭ ءارقايسىسىندا %100 تاراتىلاتىن اۋديو ترەكتى تاڭداۋعا مۇمكىندىك بەرەدى.
