بيىل العاشقى قوڭىراۋ باسقاشا وتەدى

نۇر-سۇلتان. قازاقپارات - بيىلعى وقۋ جىلىندا العاشقى قوڭىراۋ شاراسىن ۇيىمداستىرۋدىڭ ءتارتىبى وزگەردى.

بۇل تۋرالى ى. التىنسارين اتىنداعى ۇلتتىق ءبىلىم اكادەمياسىنىڭ ادىستەمەلىك نۇسقاۋ حاتىندا جازىلعان، - دەپ حابارلايدى Massaget.kz.

بيىل ى. التىنسارين اتىنداعى ۇلتتىق ءبىلىم اكادەمياسىنىڭ «2022-2023 وقۋ جىلىندا قازاقستان رەسپۋبليكاسىنىڭ ورتا ءبىلىم بەرۋ ۇيىمدارىندا وقۋ- تاربيە پروتسەسىن ۇيىمداستىرۋدىڭ ەرەكشەلىكتەرى تۋرالى» ادىستەمەلىك نۇسقاۋ حاتى جاريالاندى. بۇل قۇجاتتا مەكتەپتە وتكىزىلەتىن ءبىرقاتار جيىنداردى ۇيىمداستىرۋ تارتىبىنە وزگەرىس ەنگىزىلگەن.

1-قىركۇيەكتە سالتاناتتى جيىننىڭ وتكىزۋ فورماتىن ءبىلىم بەرۋ ۇي̆ىمى دەربەس ايقىنداي̆تىنى ايتىلعان.

سونداي-اق، جالپى مەكتەپتىك سالتاناتتى ءىس- شارالاردى وتكىزۋگە قوي̆ىلاتىن تالاپتار وزگەردى. ەندى ءىس- شارا وتكىزگەندە كوگەرشىندەر مەن شارلاردى ۇشىرۋعا بولمايدى.

«بالالارعا ەكولوگيالىق تاربيە بەرۋ، قورشاعان ورتانى لاستاماۋ، تابيعات پەن جانۋارلارعا قامقور بولۋ ماقساتىندا سالتاناتتى جيىن كەزىندە شارلار مەن كوگەرشىندەردى پايدالانۋ ۇسىنىلمايدى»، - دەدى وقۋ- اعارتۋ مينيسترلىگىنىڭ باسپا ءسوز قىزمەتى وكىلى.

«سالتاناتتى جيىندى وتكىزۋ ءتۇرىن، قاتىسۋشىلار قۇرامىن ءبىلىم بەرۋ ۇيىمدارى دەربەس ايقىندايدى. انيماتورلاردى، مەرەكەلىك اگەنتتىكتەردى، ارتىستەردى، مەرەكەلىك ءىس- شارالاردى وتكىزۋ ءۇشىن اقىلى جەكە ستۋديالاردى تارتۋعا؛ مەرەكەلىك داستارقاندار جايۋعا؛ مەكتەپ عيماراتى مەن اۋماعىن شارلارمەن بەزەندىرۋگە رۇقسات ەتىلمەيدى»، - دەدى ۆەدومستۆو وكىلدەرى.

سونداي-اق، ۆەدومستۆو وكىلدەرى 1-قىركۇيەك قارساڭىندا مۇعالىمدەرگە گۇل سىيلاۋعا بولاتىنى تۋرالى ايتتى.

«جىل سايىن 1-قىركۇيەك قارساڭىندا قوعامدا «مۇعالىمگە گۇل سىيلاۋعا بولا ما جانە بۇل زاڭ بۇزۋشىلىق بولىپ سانالماي ما« دەگەن سۇراق تۋىندايدى. ءيا، بولادى. بۇل جاقسى ءداستۇر دەپ سانالادى»، - دەدى ۆەدومستۆو وكىلدەرى.