ديزەل جەتكىلىكتى، قولدان دۇربەلەڭ تۋعىزبايىق - ەنەرگەتيكا ءمينيسترى
«جالپى بۇگىندە ەلىمىزدە جانار-جاعارمايدىڭ قورى دا، ءوندىرىسى دە جەتكىلىكتى. ءبىز مىنانى اتاپ ايتقىمىز كەلەدى: ترانزيتتىك تاسىمالدىڭ ۇلكەن اعىنى بايقالاتىن ماۋسىم بولعاندىقتان، وعان قوسا اۋىل شارۋاشىلىعىندا جۇمىستاردىڭ قىزاتىنىنا بايلانىستى ديزەلدىڭ ۇلكەن كولەمىن ءبىرىنشى كەزەكتە اۋىل شارۋاشىلىعى تاۋارىن وندىرۋشىلەر مەن جانارماي ستانسالارىنا جىبەرەمىز. الەۋمەتتىك جەلىدە ترانزيتتىك جانە ترانزيتتىك ەمەس كولىكتەردىڭ وتە ۇلكەن كولەمدە جانارماي قۇيىپ اكەتىپ جاتقان ۆيدەولارىن كوبىڭىز كورگەن شىعارسىزدار. باعاداعى ايىرماشىلىققا بايلانىستى وسىلاي بولىپ جاتىر. قازاقستاندا ديزەلدىڭ ءبىر ليترى 230-260 تەڭگەدەن ساتىلىپ جاتىر. ال كورشى ەلدەردە 400 تەڭگەدەن ارتىق. 420-450 تەڭگەگە دەيىن بارادى. مىسالى، ارمەنيادا ءبىر ليترى 700 تەڭگەدەن اسادى. ارينە، وسىنداي جاعدايدا جانارمايدىڭ زاڭسىز اعىنىن قاتتى باقىلاۋ كەرەك. اسىرەسە ديزەلدىڭ اعىنىن باقىلايمىز. ءبىراق باعا ايىرماشىلىعى جانارمايدىڭ باسقا تۇرلەرىندە دە بايقالىپ وتىر»، - دەدى بولات اقشولاقوۆ.
ايتۋىنشا، جانارماي تاپشىلىعىن بولدىرماۋ ءۇشىن تۇراقتى كوميسسيا جۇمىس ىستەپ تۇر.
«ديزەل تۇتىنۋدىڭ شارىقتاۋ كەزەڭى شىلدە، تامىز قىركۇيەك ەكەنىن ەسكەرسەك، جانارماي جەلىلەرى ارقىلى ساتىلىم كولەمى 2-2,5 ەسە ءوسىپ وتىر. ول قاجەتتىلىكتىڭ ءبارىن قىسقا مەرزىمدە جابۋعا جانارماي قورى جەتكىلىكتى. ءبىراق لوگيستيكادا پروبلەمالار شىعا باستادى.
جانارماي جونەلتۋدىڭ ەسكى جوسپارى بويىنشا قۋاتتىلىق ەلدەگى قالىپتى قاجەتتىلىكتىڭ 100، 110، ارى كەتسە 130 پايىزى كولەمىندە مەجەلەنگەن. سوندىقتان ارنايى كوميسسيا اياسىندا «قازاقستان تەمىر جولى» ۇلتتىق كومپانياسىمەن، مۇناي وڭدەۋ زاۋىتتارىمەن بىرگە كۇندەلىكتى جۇمىس جۇرگىزىپ جاتىرمىز. كەيىنگى ەكى كۇننىڭ ىشىندە جانارماي جونەلتۋ كولەمى ۇلعايدى. تاسىمالداۋشى ۆاگونداردىڭ كولەمىن دە ارتتىردىق. جاقىنداعى، شالعايداعى وڭىرلەر جولعا كەتەتىن ۋاقىتقا قاراي جانارمايدىڭ قورىن 3 كۇننەن 10 كۇنگە دەيىن قامداپ قويدى. سوندىقتان بارشاڭىزدى ارتىق دۇربەلەڭ تۋدىرماۋعا شاقىرامىن. جانارماي شىعاراتىن ءۇش زاۋىت تا ىستەپ تۇر. قوسىمشا قور دا بار. تامىزدىڭ اياعىنا دەيىن ديزەلدىڭ 288 مىڭ توننا قورى جاساقتالادى. بۇل وپەراتيۆتى قور دەۋگە بولادى. ونىڭ سىرتىندا 1 ميلليون تونناداي ديزەل ءوندىرىلىپ جاتىر. قولدا بار قور ءبىتىپ، تاپشىلىق بولادى دەپ ايتۋعا بولمايدى. زاۋىتتاردىڭ ءبىرى توقتاپ، جونەلتۋدە كۇتپەگەن قيىندىقتار بولعاننىڭ وزىندە بۇل قور قاجەت ديزەلمەن ەكى اپتادان ءبىر ايعا دەيىن قامتاماسىز ەتۋگە جەتكىلىكتى»، - دەدى ەنەرگەتيكا ءمينيسترى.
