ءماجىلىس دەپۋتاتتارى وڭىرلەردەگى جول جانە اۋىز سۋمەن قامتۋ ماسەلەلەرىن تالقىلادى

نۇر- سۇلتان. قازاقپارات - اتىراۋ وبلىسىندا جول جوندەۋ، ال جامبىل وبلىسىندا اۋىز سۋمەن قامتۋدا شەشىمىن كۇتكەن ءبىرقاتار ماسەلە بار.

ءماجىلىس دەپۋتاتتارى، «AMANAT» پارتياسىنىڭ مۇشەلەرى وڭىرلەرگە ساپارى بارىسىندا الەۋمەتتىك ماڭىزى بار جوبالاردىڭ جۇزەگە اسىرىلۋىن تالقىلادى، دەپ حابارلايدى قازاقپارات پالاتانىڭ باسپا ءسوز قىزمەتىنە سىلتەمە جاساپ.

ءماجىلىس دەپۋتاتتارى «ەمبى مۇنايگاز» ەڭبەك ۇجىمىمەن كەزدەسىپ، مۇناي سالاسىنا قاتىستى جالپى جۇمىستاردىڭ باعىتىمەن تانىستى. جيىندا اتىراۋ وبلىسى ءۇشىن ماڭىزدى تاقىرىپتىڭ بىرىنە اينالعان «اتىراۋ- استراحان» تاس جولىنداعى كۇردەلى جوندەۋ جۇمىستارى تۋرالى ماسەلەلەر كوتەرىلدى. سونىمەن قاتار، وڭىردەگى «يندەر- قاراباۋ» تاس جولىنىڭ وبلىس تۇرعىندارى ءۇشىن دە، تاسىمال ءۇشىن دە ماڭىزدى ەكەنى ايتىلىپ، ۋاقتىلى ءبىتىرۋدىڭ ماڭىزدى ەكەنىنە نازار اۋدارىلدى.

«بۇل جول جوسپار بويىنشا بىرنەشە جىلعا سوزىلادى. ول بار بولعانى 80 شاقىرىم. بيىل قارجى ءبولىپ، قالعانىن كەلەسى جىلعا قالدىرىپ، ۋاقىت سوزىپ جۇرگەندە جاسالعان جولدىڭ توزىپ كەتۋى دە مۇمكىن»، - دەدى س. ناقپايەۆ.

دەپۋتات الەۋمەتتىك ماڭىزى بار ماسەلەلەردىڭ ورىندالۋ بارىسى قاشان دا ۇلكەن مانگە يە ەكەنىنە توقتالدى. وتىرىستا ەكولوگيالىق احۋال ماسەلەسى تالقىلاندى.

ال، ءماجىلىس دەپۋتاتى ءنازيلا راززاق جامبىل وبلىسىنىڭ سارىكەمەر اۋىلىنداعى اۋىز سۋ قۇبىرىنىڭ قۇرىلىسىمەن تانىسىپ، جەلىلەر جانە سۋ قابىلداۋ عيماراتتارىنىڭ قۇرىلىسىن جۇرگىزگەن «ينتەللەكت ازيا» ۇجىم وكىلدەرىمەن كەزدەستى.

ايتا كەتۋ كەرەك، سۋ قۇبىرى «AMANAT» پارتياسىنىڭ 2021-2025 -جىلدارعا ارنالعان سايلاۋالدى باعدارلاماسىن ىسكە اسىرۋ جونىندەگى جول كارتاسى اياسىندا پايدالانۋعا بەرىلىپ وتىر.

«مەملەكەت باسشىسى قوعامدى تولعاندىرعان الەۋمەتتىك- ەكونوميكالىق پروبلەمالاردى شەشۋ جونىندەگى ءبىرقاتار مىندەتتى اتاپ وتكەن بولاتىن. ونىڭ ىشىندە باعانىڭ ءوسۋى، تاۋارلاردىڭ جەكەلەگەن تۇرلەرىن جەتكىزۋدەگى بوگەلىستەر، ازىق- تۇلىك قاۋىپسىزدىگى، حالىق تابىسىنىڭ تومەندەۋى، سونداي- اق ەلدى مەكەندەردى تازا اۋىز سۋمەن قامتاماسىز ەتۋ سىندى ماسەلەلەر بار»، - دەدى ءماجىلىس دەپۋتاتى.

اۋدان ورتالىعى سانالاتىن سارىكەمەر اۋىلىندا قازىر 30 مىڭنان استام ادام تۇرادى.

«وتكەن جىلدىڭ جەلتوقسان ايىندا ءۇش جىلعا سوزىلعان سۋ قابىلداۋ نىسانى جانە سۋ قۇبىرى جەلىلەرىنىڭ قۇرىلىسى اياقتالىپ، سارىكەمەر اۋىلدىق وكرۋگى تۇرعىندارىنىڭ يگىلىگىنە ۇسىنىلدى. ءبىراق اۋىز سۋ ماسەلەسى وسىمەن شەشىلدى جانە دە ءوز دارەجەسىندە دەپ ايتا المايمىز»، - دەيدى اۋىل تۇرعىندارى.

ءوز كەزەگىندە دەپۋتات اتالعان ماسەلەلەر جەرگىلىكتى اتقارۋشى، قاداعالاۋشى مەملەكەتتىك ورگاندار مەن دەپۋتاتتاردىڭ ەرەكشە نازارىندا بولاتىنىن ايتتى.