بۇل ماراپات بۇكىل ازەربايجان حالقىنا دەگەن قۇرمەتتىڭ بەلگىسى دەپ بىلەمىن - يلحام اليەۆ

باكۋ. قازاقپارات - مەملەكەت باسشىسى قازاقستان رەسپۋبليكاسى مەن ازەربايجان رەسپۋبليكاسى اراسىنداعى ەكىجاقتى ساياسي، ەكونوميكالىق جانە مادەني قاتىناستاردى نىعايتۋعا جانە دامىتۋعا قوسقان ايرىقشا ۇلەسى ءۇشىن ازەربايجان رەسپۋبليكاسىنىڭ پرەزيدەنتى يلحام اليەۆتى «التىن قىران» وردەنىمەن ناگرادتادى، دەپ حابارلايدى قازاقپارات اقورداعا سىلتەمە جاساپ.

«قۇرمەتتى يلحام گەيدار وعلۋ، بۇگىن مەن ءسىزدىڭ ەلىڭىزگە رەسمي ساپارمەن كەلىپ وتىرمىن. ءبىزدىڭ شاعىن قۇرامداعى كەلىسسوزىمىز وتە ناتيجەلى بولدى. مەنىڭ ساپارىمنىڭ باعدارلاماسىندا ءسىزدى قازاقستان رەسپۋبليكاسىنىڭ ەڭ جوعارى «التىن قىران» وردەنىمەن ماراپاتتاۋ ءراسىمى دە قاراستىرىلعان.

قازاقستاندا ءسىزدى كورنەكتى مەملەكەت قايراتكەرى رەتىندە بىلەدى، قۇرمەتتەيدى. بۇكىل الەمگە تانىمال تۇلعا رەتىندە سىيلايدى. ازەربايجاندى تاريحي جەڭىسكە جەتكىزگەن، ب ۇ ۇ قاۋىپسىزدىك كەڭەسىنىڭ قارارلارىنا سايكەس، تەرريتوريالىق تۇتاستىعىن قالپىنا كەلتىرگەن اكەلگەن ادام رەتىندە مەن بۇگىن ءبىزدىڭ جەكە كەزدەسۋىمىزدە ءسىزدى قۇتتىقتادىم.

ءسىز مەملەكەتتەرىمىزدىڭ كوپجاقتى، كوپقىرلى ىنتىماقتاستىعىن دامىتۋعا زور ۇلەس قوسىپ كەلەسىز. بارشا قازاق حالقىنىڭ اتىنان قۇرمەت بەلگىسى رەتىندە بۇگىن سىزگە «التىن قىران» وردەنىن تابىس ەتكىم كەلەدى»، - دەدى پرەزيدەنت قاسىم-جومارت توقايەۆ.

ازەربايجان رەسپۋبليكاسىنىڭ پرەزيدەنتى يلحام اليەۆ بۇل ماراپاتتى بۇكىل ازەربايجان حالقىنا دەگەن قۇرمەتتىڭ بەلگىسى دەپ قابىلدايتىنىن جەتكىزدى.

«ءبىز ءۇشىن باۋىرلاس ەل قازاقستاننىڭ ەڭ جوعارى وردەنىمەن مەنى ماراپاتتاۋدى قاجەت دەپ ساناعانىڭىزدى ماقتان تۇتامىن. مەن ءوز تاراپىمنان الداعى ۋاقىتتا دا دوستىق جانە باۋىرلاستىق قارىم-قاتىناسىمىزدى دامىتۋعا ۇلەس قوسۋ ءۇشىن بارلىعىن جاسايمىن.

ءبىزدىڭ حالىقتارىمىزدى تاريحىمىز، ورتاق تامىرىمىز بايلانىستىرادى. بۇگىنگى تاڭدا ەگەمەندىك جولىمەن سەنىمدى قادام باسىپ كەلە جاتقان ەكى تاۋەلسىز مەملەكەت - قازاقستان مەن ازەربايجان ەكونوميكالىق دامۋدىڭ جانە الەۋمەتتىك ماسەلەلەردى شەشۋدىڭ جوعارى قارقىنىن كورسەتىپ كەلەدى. الەمدىك ارەنادا ءبىزدىڭ ەلدەرىمىزدىڭ بەدەلى ارتىپ كەلەدى.

مەن بۇل ماراپاتتى بۇكىل ازەربايجان حالقىنا دەگەن قۇرمەتتىڭ بەلگىسى دەپ بىلەمىن. ءسىزدىڭ قولىڭىزدان وسى ماراپاتتى الۋ مەن ءۇشىن زور ابىروي.

ءسىز جۇزەگە اسىرىپ جاتقان رەفورمالار كۋرسىن تولىق قولدايتىنىمدى تاعى ءبىر رەت ايتقىم كەلەدى. ءسىز جۇرگىزىپ وتىرعان ساياسات قازاقستان حالقىنىڭ ۇلتتىق مۇددەسىنە تولىق جاۋاپ بەرەدى. العا قويعان ماقساتتارىڭىزدىڭ ءبارى ورىندالاتىنىنا سەنىمدىمىن»، - دەدى پرەزيدەنت يلحام اليەۆ.