ۇ ب ت: تالاپكەردىڭ يكەمى بار ماماندىعىن انىقتايتىن پلاتفورما جاسالادى
وسىعان سايكەس، ەندى ەمتيحاننان قايتا وتكەندەردىڭ قورىتىندىلارى نەگىزىندە تالاپكەردىڭ قانداي ماماندىققا يكەمى بارى انىقتالىپ وتىرادى. جوعارى جانە كاسىپتىك ءبىلىم بەرۋ سالاسىنداعى ماسەلەلەر تالقىلانعان فورۋمدا عىلىم جانە جوعارى ءبىلىم ءمينيسترى ساياسات نۇربەك وسىلاي ءمالىم ەتتى، دەپ حابارلايدى قازاقپارات ءتىلشىسى.
«ۇلتتىق تەستىلەۋ ورتالىعىنىڭ نەگىزىندە ۇ ب ت- نى ءبىر رەت ەمەس، بىرنەشە مارتە تاپسىرۋعا مۇمكىندىك بەرىلەدى. ءبىز تالاپكەر ءوزىن-ءوزى باعالاۋى ءۇشىن ارنايى پلاتفورما ەنگىزىپ جاتىرمىز. ەندى تالاپكەر بىرنەشە رەت تەستىلەۋدەن وتەدى جانە سول ارقىلى ءوزىنىڭ مىقتى تۇستارىن كورەدى. وعان بيىل ناقتى گرانت بەرىلەتىنى نەمەسە قانداي ماماندىقتار سول بالاعا سايكەس كەلەتىنى كورسەتىلەدى. ول اقپارات جەكە تالاپكەرگە، ونىڭ اتا-اناسىنا جولدانادى. سوسىن ول ۇ ب ت- عا كىرىپ، وزىنە قاجەت تاڭداۋ ءپانىن ايقىندايدى. ءبىزدىڭ ءۇمىتىمىز وسى مەحانيزم ارقىلى جاعدايدى وزگەرتۋ»، - دەپ ءمالىم ەتتى عىلىم جانە جوعارى ءبىلىم ءمينيسترى.
بۇدان بولەك فورۋم اياسىندا ساياسات نۇربەك ءبىلىم گرانتىن ءبولۋ مەحانيزمى مەكتەپتەگى كاسىپتىك باعدارلاۋمەن سايكەستەندىرىلەتىنىن جەتكىزدى.
