اقتاۋداعى يتبالىقتاردىڭ ادامعا شابۋىلداۋىنا ەكولوگتەر تۇسىنىك بەردى
تەڭىزدە تىرشىلىك ەتەتىن اڭداردىڭ بۇل ارەكەتىنە ەكولوگتەر تۇسىنىك بەردى، دەپ حابارلايدى قازاقپارات ءتىلشىسى.
يتبالىقتاردىڭ شابۋىلىنا ۇشىراعاننىڭ ءبىرى 33 جاسار جىگىت بولسا، ەكەۋى - قىز بالا. ولاردىڭ دەنەلەرىن سۋ ىشىندە بايقاۋسىزدا كەلىپ يتبالىق تىستەپ، جاراقات سالعانىن جازعان ەدىك.
«ادامداردى تىستەگەن يتبالىقتىڭ كۇشىگى بولسا، وندا ول قورىققاننان سونداي ارەكەتكە باردى دەۋگە بولادى. ويتكەنى كوكتەمدە ومىرگە كەلگەن تولدەر ادامدارمەن جاقىن كەلگەندە قورعانعان بولۋى مۇمكىن. ال تىستەگەن ۇلكەن يتبالىق بولسا، قۇزىرلى ورىنداردىڭ نازار اۋدارعانى دۇرىس. ولارعا جىل جاسايىن مونيتورينگىلىك- باقىلاۋ جۇمىستارىن جۇرگىزىپ تۇرۋدى ۇسىنامىن»، - دەدى تاۋەلسىز ەكولوگ ادىلبەك قوزىباقوۆ.
جالپى ەكولوگ تەڭىزدىڭ جاعاسىندا وسكەن بالا رەتىندە يتبالىقتاردىڭ ادامدارعا شابۋىلداۋى اۋەلدەن بار ەكەنىن ايتادى. اناسىنىڭ ۇنەمى يتبالىق تىستەپ الماسىن دەپ ەسكەرتىپ وتىراتىنىن ەسىنە الدى.
