بيداي باعاسىنىڭ ءوسۋى الەۋمەتتىك نان قۇنىنا اسەر ەتكەن جوق - مينيستر
بۇل تۋرالى بۇگىن ۇكىمەت وتىرىسىندا ق ر اۋىل شارۋاشىلىعى ءمينيسترى ەربول قاراشوكەيەۆ ايتتى، دەپ حابارلايدى قازاقپارات ءتىلشىسى.
«ەگىن جيناۋ ناۋقانىن تابىستى وتكىزۋدىڭ نەگىزگى ماسەلەسى فەرمەرلەردى قاراجاتپەن قامتاماسىز ەتۋ بولىپ سانالادى. بيىل «اگرارلىق نەسيە كورپوراتسياسى» اكتسيونەرلىك قوعامى جەلىسى بويىنشا كوكتەمگى دالا جانە ەگىن جيناۋ جۇمىستارىن قارجىلاندىرۋدىڭ جالپى سوماسى 140 ميلليارد تەڭگەنى قۇرايدى. بۇگىنگى تاڭدا «كەڭ دالا» باعدارلاماسى اياسىندا 110,0 ميلليارد تەڭگە سوماسىنا 3,7 مىڭنان استام ءوتىنىم قارجىلاندىرىلدى. سونداي-اق مەملەكەت باسشىسىنىڭ تاپسىرماسى اياسىندا وسى جىلى ازىق-تۇلىك كورپوراتسياسى اۋىل شارۋاشىلىعى ونىمدەرىن فورۆاردتىق ساتىپ الۋدى جۇزەگە اسىردى. سونىڭ ارقاسىندا ازىق- تۇلىك كورپوراتسياسىنىڭ رەسۋرستارىنا 1 137,3 مىڭ توننا كولەمىندە استىق جەتكىزۋگە كەلىسىمشارت جاسالدى. ول ءۇشىن 80 ميلليارد تەڭگە ءبولىندى»، - دەدى مينيستر.
ەربول قاراشوكەيەۆتىڭ دەرەگىنشە، ازىق- تۇلىك كورپوراتسياسىندا 362,8 مىڭ توننا كولەمىندە رەزەرۆتىك استىق قورى بار.
«اتالعان استىق كولەمى قاجەت بولعان جاعدايدا ىشكى نارىقتى تۇراقتاندىرۋ جانە ازىق- تۇلىك قاۋىپسىزدىگىن قامتاماسىز ەتۋ ماقساتىندا ىشكى نارىققا جىبەرىلەتىن بولادى. مىسالى، وسى جىلى ازىق- تۇلىك كورپوراتسياسىنىڭ رەسۋرستارى الەۋمەتتىك نان باعاسىن تۇراقتاندىرۋدى جۇزەگە اسىردى. ۇن تارتۋ كاسىپورىندارىنا وڭىرلەردىڭ وتىنىمدەرى بويىنشا جوسپارلانعا كولەم 256,8 مىڭ توننا بولسا، 204,9 مىڭ توننا تيەپ، جونەلتىلدى. كورىپ وتىرعانىمىزداي، بيداي باعاسىنىڭ ءوسۋى الەۋمەتتىك نان باعاسىنا اسەر ەتكەن جوق»، - دەدى ول.
مينيستر قازىرگى ۋاقىتتا ءبىرىنشى كەزەكتەگى مىندەت وسىرىلگەن ءونىمدى ىسىراپسىز جيناپ الۋ بولىپ وتىرعانىن باسا ايتتى.
«بۇل رەتتە ەسكەرەر جايت، قازگيدرومەتتىڭ بولجامىنا سايكەس كۇزدە رەسپۋبليكانىڭ باسىم بولىگىندە جاۋىن- شاشىن نورما شەگىندە، سولتۇستىك- شىعىستا نورمادان ارتىق بولادى دەپ كۇتىلەدى. تۋىنداعان ماسەلەلەر ەگىن جيناۋ جۇمىستارىن جۇرگىزۋ جونىندەگى رەسپۋبليكالىق جەدەل شتاب اياسىندا شەشىلۋدە. ەگىن جيناۋ ناۋقانىنىڭ بارىسى مينيسترلىكتىڭ تۇراقتى باقىلاۋىندا»، - دەدى ەربول قاراشوكەيەۆ.
