مەملەكەتتىك تۋدى تاسقىندى سۋدان الىپ شىققان پوليتسەيدىڭ لاۋازىمى ءوستى

تۇركىستان. قازاقپارات - تاسقىن سۋ ورتاسىنان مەملەكەتتىك تۋدى الىپ شىققان ەسىمجان ءنادىروۆ ماقتاارال اۋداندىق پوليتسيا ءبولىمىنىڭ باستىعى بولىپ تاعايىندالدى، دەپ حابارلايدى قازاقپارات ءتىلشىسى.

وتكەن جىلدىڭ جەلتوقسان ايىندا ماقتاارال اۋدانىندا سۋ تاسقىنى بولىپ، پوليتسيا مايورى ەسىمجان ءنادىروۆ سۋىق سۋدى بەلۋاردان كەشىپ، مەملەكەتتىك تۋدى اسا ۇقىپتىلىقپەن تاسقىن ورتاسىنان الىپ شىققان بولاتىن. بۇل كورىنىس ۆيدەوسى الەۋمەتتىك جەلىدە كەڭىنەن تاراپ، كوپشىلىكتى ءتانتى ەتكەن ەدى.

پوليتسيا مايورى ەسىمجان ۇسەنبەك ۇلى ءنادىروۆ ىشكى ىستەر ورگاندارىندا 2007-جىلدان بەرى قىزمەت ەتىپ كەلەدى. ءبىلىمى جوعارى، زاڭگەر. 2011-جىلى ق ر ءى ءى م الماتى اكادەمياسىن بىتىرگەن.

ەڭبەك جولىن شىمكەنت قالاسى ءال-فارابي اۋداندىق پوليتسيا باسقارماسىندا تەرگەۋشىسى بولىپ باستاعان. كەيىنگى جىلدارى ماقتاارال اۋدانىندا تەرگەۋشى، اعا تەرگەۋشى، انىقتاۋ ءبولىمىنىڭ باستىعى، كوشى-قون پوليتسياسى ءبولىمىنىڭ باستىعى قىزمەتتەرىن اتقاردى.

2019-جىلدان بەرى جەتىساي اۋدانى پوليتسيا ءبولىمى باستىعىنىڭ ءبىرىنشى ورىنباسارى بولدى.