افريكالىق قىز قازاق ءتىلىن ءوز ەركىمەن ۇيرەنىپ الدى

نۇر-سۇلتان. قازاقپارات - قازاقستاندىق تەلەجۇرگىزۋشى لاميناتا ايشا ۋەدراوگو تەگىن ونلاين سايت ارقىلى قازاق ءتىلىن قالاي ۇيرەنگەنىن ايتتى.

اميناتانىڭ اناسى - قازاق، اكەسى بۋركينا- فاسودان (باتىس افريكا). وتباسى 10 جىلدان كەيىن قازاقستانعا كەلگەن. لاميناتا ءوزىن ەكى ءناسىلدىڭ وكىلى دەپ سانايدى. ويتكەنى ول وزىنە ءتان ءداستۇرى، مەنتاليتەتى، ءتىلى بار، ءارتۇرلى كونتينەنتتە ورنالاسقان ەكى ەلدە ءومىر ءسۇرىپ كەلەدى.

اميناتا - الدىنا ماقسات قويا بىلەتىن ادام. تەلەجۇرگىزۋشى ءتورت ءتىل بىلەدى: فرانسۋز، اعىلشىن، ورىس جانە قازاق ءتىلى. 14 جاسىندا مودەل بولدى. بيمەن اينالىسادى، ساياحاتتاعاندى جاقسى كورەدى جانە ءوزىن دامىتۋعا كوڭىل بولەدى. «قايىرلى تاڭ، قازاقستان» تاڭعى باعدارلاماسىنىڭ تەلەجۇرگىزۋشىسى Soyle جوباسى تۋرالى 2018 -جىلى بىلگەن.

«وزىمە قازاق ءتىلى مۇعالىمىن ىزدەپ جۇرگەن كەزدە سايتقا تىركەلگەن بولاتىنمىن. مۇعالىم تاپپاعان سوڭ Soyle.kz سايتىنان ءوز بەتىمشە ۇيرەنە باستادىم. ەڭ الدىمەن سايت مەنى ءتۇرلى ءتۇستى ديزاينىمەن جانە ىڭعايلى ينتەرفەيسىمەن قىزىقتىردى. بارلىق ماتەريال قولجەتىمدى بولعانى سونشالىق، العاشقى ساباقتان باستاپ قازاق ءتىلى الەمىنە ساياحات جاسادىم. بارلىق ساباق قازاق تىلىندە سويلەپ كورمەگەن كەز كەلگەن ادامنىڭ گرامماتيكانى ءوز بەتىنشە يگەرىپ، ءتىل ۇيرەنۋىنە ىڭعايلى ەتىپ جاسالعان. اسىرەسە، تىڭدالىمى بار سوزدىك ءبولىمىن، قازاق ءتىلىن تىڭداۋعا جانە تۇسىنۋگە كومەكتەسەتىن ديالوگتارى بار ويىنداردى، تاپسىرمالار مەن بەينەساباقتاردى ەرەكشە اتاپ وتكىم كەلەدى، - دەيدى اميناتا ۋەدراوگو.

اميناتانىڭ ايتۋىنشا، پاندەميا كەزىندە پورتالدىڭ كوپ پايداسى تيگەن. بۇگىندە ونىڭ ونلاين- پلاتفورمالار اراسىنداعى ماڭىزى ارتا ءتۇستى.

«موبيلدى قوسىمشانىڭ تيىمدىلىگىن ايتپاي كەتۋگە بولماس. مەن Soyle موبيلدى قوسىمشاسىن جولدا نەمەسە جۇمىستاعى ءۇزىلىس كەزىندە قولدانامىن. بۇل قازىر وتە ىڭعايلى دۇنيە. الەۋمەتتىك جەلىلەرگە كەلەتىن بولساق، Telegram جانە Instagram-داعى Soyle پاراقشاسىنا جازىلدىم. پاراقشالاردا سايتتان الىنعان ماتەريالدار بار. ولار قىزىقتى ءارى زاماناۋي فورماتتا بەرىلەدى، - دەيدى تەلەجۇرگىزۋشى.

اميناتا بۇل سايت قازاق ءتىلىن جاڭادان ۇيرەنىپ جۇرگەندەرگە دە، ودان جوعارى دەڭگەيدە بىلەتىندەرگە دە تاپتىرماس دۇنيە دەپ سانايدى. مىسالى، قازاق ءتىلى مۇعالىمدەرى مەن مەكتەپ تۇلەكتەرى سايتتان قوسىمشا ءبىلىم الۋىنا بولادى.

Soyle.kz جوباسىنان كوپتەگەن ماتەريال تابۋعا بولادى: باستاپقى دەڭگەيدەن كۇردەلى دەڭگەيگە دەيىنگى تەگىن ساباقتار، سوزدىك، اۋديو جانە بەينەماتەريالدار. جوبانى Samruk-Kazyna Trust الەۋمەتتىك جوبالاردى دامىتۋ قورى جانە نۇرسۇلتان نازاربايەۆ قورىنىڭ قولداۋى اياسىندا مەملەكەتتىك ءتىلدى دامىتۋ قورىنىڭ ماماندارى جاسادى.

بۇگىندە سايتقا الەمنىڭ تۇكپىر-تۇكپىرىنەن 240 مىڭنان استام پايدالانۋشى تىركەلگەن. قازاق ءتىلىن گەرمانيا، رەسەي، چەحيا جانە باسقا ەلدىڭ تۇرعىندارى ۇيرەنىپ جاتىر. سايتتىڭ ورىس، اعىلشىن جانە تۇرىك تىلىندەگى نۇسقالارى دا بار.