ەلوردادا سپيدكۋبينگتەن ازيا چەمپيوناتى وتەدى

نۇر-سۇلتان. قازاقپارات - ەلىمىزدە العاش رەت سپيدكۋبينگتەن ازيا چەمپيوناتى وتپەك، دەپ حابارلايدى قازاقپارات ءتىلشىسى.

اتالعان سپورت تۇرىنەن ازيا چەمپيوناتى 2 جىلدا ءبىر وتەدى. جارىستى وتكىزەتىن ەل بايقاۋ ارقىلى انىقتالادى.

بيىل سپيدكۋبينگتەن ازيا چەمپيوناتىن وتكىزۋ قۇرمەتى ورتالىق ازيا ەلدەرى اراسىندا العاش قازاقستانعا بۇيىرىپ تۇر. سونداي-اق، اتالعان سپورتتىق باسەكە تمد ەلدەرى اراسىندا دا تۇڭعىش وتكەلى تۇر.

سونداي-اق، ۇيىمداستىرۋشىلاردىڭ ايتۋىنشا، چەمپيونات اياسىندا رۋبيك تەكشەسىن (كۋبيك رۋبيك) قۇراستىرۋشى شەبەرلەر الەمگە تانىمال جەرلەستەرىمىز ءانشى ديماش قۇدايبەرگەن مەن بوكسشى گەننادي گولوۆكيننىڭ كەسكىنىن قۇراستىرىپ شىعادى.

«نۇر-سۇلتان قالاسىندا وتەتىن سپيدكۋبينگ چەمپويناتى 4 كۇنگە سوزىلادى. جارىستا ازيانىڭ ۇزدىكتەرىن انىقتايتىن بولامىز. جەڭىمپازدار جارىس سوڭىندا بەلگىلى بولادى. ۇمىتكەرلەر 17 ءتارتىپ بويىنشا سايىسقا تۇسەدى. سىناق كلاسسيكالىق تۇردەن باستاۋ الىپ، كەزەڭ سايىن قيىنداي تۇسەدى»، - دەدى قازاقستان سپيدكۋبينگ فەدەراتسياسىنىڭ پرەزيدەنتى ارمان ءماشىموۆ چەمپيوناتتى وتكىزۋگە وراي وتكەن باسپا ءسوز ءماسليحاتىندا.

سونداي-اق، قاۋىمداستىق باسشىسى ەلىمىزدە سپيدكۋبينگتى ينتەللەكتۋالدى سپورتتىق باعىت رەتىندە دامىتۋ كەرەكتىگىن ايتىپ وتىر.

اتالعان سپورتتىق باسەكە ەلوردادا ەرتەڭ باستالادى. چەمپيوناتقا 13 ەلدەن 18-20 جاس ارالىعىنداعى 116 سپورتشى قاتىسپاق.

ايتا كەتسەك، سپيدكۋبينگتەن ازيا چەمپيوناتىنىڭ كۋبوگى «بايتەرەك» تارىزدەس بولادى. سونىمەن قاتار جەڭىمپازدارعا دۇنيەجۇزىلىك سپيدكۋبينگ قاۋىمداستىعىنىڭ (World Cube Association) مەدالى تابىستالماق. سايىستىڭ جالپى جۇلدە قورى 9 مىڭ ا ق ش دوللارىن قۇرايدى.