بالاسىن مەكتەپكە كيىندىرۋگە قارجىلاي كومەك العان اتا- انالار چەك كورسەتىپ، ەسەپ بەرۋگە ءتيىس
بۇل تۋرالى ق ر وقۋ-اعارتۋ مينيسترلىگى بالالاردىڭ قۇقىعىن قورعاۋ كوميتەتى ءتوراعاسىنىڭ ورىنباسارى دۋلات جەكەبايەۆ ءمالىم ەتتى، دەپ حابارلايدى قازاقپارات ءتىلشىسى.
«اتا-انا نەمەسە بالانىڭ زاڭدى وكىلىنە «جالپىعا مىندەتتى ءبىلىم بەرۋ» قورىنان قارجىلاي كومەك الۋعا ءوتىنىش جازعان كەزدە جاۋاپكەرشىلىك تۋرالى ەسكەرتىلەدى. ياعني اتا-انا قوردان العان قارجىنى ماقساتتى جۇمساپ، دالەل رەتىندە العان زاتتىڭ چەگى نەمەسە كۆيتانتسياسىن ۇسىنۋعا كەلىسىمىن بەرەدى. چەك پەن كۆيتانتسيانى قوردان قارجىسىن قولىنا العاننان كەيىن 15 كۇننىڭ ىشىندە تاپسىرۋ كەرەك. سونىمەن قاتار اتا-انا جالعان اقپارات نەمەسە جالعان چەك ۇسىنعان جاعدايدا جاۋاپكەرشىلىكتىڭ بارىن بىلەدى. قاجەت جاعدايدا قىلمىستىق ىسكە دەيىن قوزعالادى»، - دەدى دۋلات جەكەبايەۆ مينيسترلىكتىڭ «Oqu-ağartu LIVe» جوباسىنىڭ ەفيرىندە.
ونىڭ ايتۋىنشا، قور قارجىسى ماقساتتى تۇردە جۇمسالۋى ءتيىس. ياعني وقۋشىعا مەكتەپكە ارنالعان كيىم-كەشەك پەن قۇرال-جابدىق ساتىپ الۋى قاجەت.
سونداي-اق، كوميتەت باسشىسىنىڭ ورىنباسارى بيىل قوردان بەرىلەتىن قارجىنىڭ شەكتى سوماسى بەلگىلەنگەنى تۋرالى ايتتى.
«بۇعان دەيىن «جالپىعا مىندەتتى ءبىلىم بەرۋ» قورىنان بەرىلەتىن سوما ءار وڭىردە ءارتۇرلى بولدى. ءتىپتى ءبىر قالانىڭ وزىندە ەكى ءتۇرلى سوما ەدى. 2020-جىلى اۋداندار بويىنشا رەتتەدىك، ياعني ءبىر سوما بەلگىلەنۋگە ءتيىس. كەيىن وبلىس، قالالاردى رەتكە كەلتىردىك. بيىلدان باستاپ رەسپۋبليكا بويىنشا شەكتى سوما ناقتىلاندى. جاڭا قاۋلىعا سايكەس ەڭ تومەنگى سوما 37389 تەڭگە. قوردان بەرىلەتىن قولداۋ اتالعان سومادان تومەن بولماۋى ءتيىس. ەگەر بەلگىلەنگەن سومادان كوپ بەرەمىز دەسە ونى وزدەرى بىلەدى. ول ماسەلەنى جەرگىلىكتى بيلىك شەشەدى»، - دەيدى ول.
ودان بولەك، «جالپىعا مىندەتتى ءبىلىم بەرۋ» قورىنان بەرىلەتىن كومەككە قاتىستى بيىلعى جاڭاشىلدىق - قولداۋ قارجىلاي بەرىلەدى. بۇعان دەيىن زاتتاي بەرىلىپ كەلگەن ەدى.
