تالاپكەرلەر تەحنيكالىق ماماندىقتارعا قىزىقپايدى - مينيسترلىك

نۇر-سۇلتان. قازاقپارات - تالاپكەرلەر تەحنيكالىق ماماندىقتارعا قىزىعۋشىلىق تانىتپايدى.

بۇل تۋرالى عىلىم جانە جوعارعى ءبىلىم مينيسترلىگىنە قاراستى جوعارى جانە جوعارى وقۋ ورنىنان كەيىنگى ءبىلىم دەپارتامەنتى ديرەكتورىنىڭ ورىنباسارى ەرجان امىربەك ۇلى ءمالىم ەتتى، دەپ حابارلايدى قازاقپارات ءتىلشىسى.

«كەشە رەسپۋبليكالىق بايقاۋ كوميسسياسى ءوز جۇمىسىن اياقتادى. كونكۋرس قورىتىندىسى بويىنشا مەملەكەتتىك ءبىلىم گرانتىنىڭ يەگەرلەرى انىقتالدى. مەملەكەت باكالاۆريات بويىنشا 75 مىڭنان استام گرانت ءبولدى. قازىرگى ۋاقىتتا تالاپكەرلەر اراسىندا پەداگوگيكا، ستوماتولوگيا، ساياساتتانۋ، حالىقارالىق قاتىناستار سياقتى ماماندىقتار تانىمال. ال، مەحانيكا، اۋىل شارۋاشىلىعى، توقىما ونەركاسىبى تەحنولوگياسى سالالارىنا قىزىعۋشىلىق تانىتقاندار از»، - دەدى ەرجان امىربەك ۇلى.

ونىڭ ايتۋىنشا، مەملەكەت باسشىسىنىڭ تاپسىرماسى بويىنشا بيىل گرانتتاردىڭ 60 پايىزى تەحنيكالىق ماماندىقتارعا باعىتتالعان.

سونىمەن قاتار، ۇكىمەت حالىق تىعىز ورنالاسقان ايماقتار مەن باتىس وڭىرلەرىنەن ءوتىنىش بەرگەن تالاپكەرلەرگە قوسىمشا 10 مىڭ گرانت ءبولدى.

بۇگىندە ونىڭ 2 مىڭنان استامى بەرىلگەن. كونكۋرس كوميسسياسى قالعان گرانتتى ءبولۋ جۇمىسىمەن اينالىسىپ جاتىر.

ەرجان امىربەك ۇلىنىڭ مالىمەتىنشە، مەملەكەتتىك ءبىلىم گرانتتارىنىڭ ءبىر بولىگى ءالى بولىنبەگەن.

ولاردى تاعايىنداۋ - كونكۋرس كوميسسياسىنىڭ قۇزىرىندا. رەسمي دەرەككە سايكەس، مەملەكەتتىك گرانتقا 79 مىڭعا جۋىق تالاپكەر ءوتىنىش جولداعان.

قازىرگى تاڭدا تالاپكەرلەردىڭ كەيبىرى ءتۇرلى سەبەپتەرمەن ءوز گرانتىنان باس تارتقان. ولار باسقا تالاپكەرلەر اراسىندا بولىنەدى.

ەسكە سالا كەتەيىك، بۇگىن مەملەكەتتىك ءبىلىم گرانتى يەگەرلەرىنىڭ ءتىزىمى جاريالانعان بولاتىن.